अपराजित मनाङ र आर्मी भिड्दै

काठमाडौं- सहिद स्मारक ‘ए’ डिभिजन लिगमा शुक्रबार दुई खेल हुँदैछ । दुवै खेल सातदोबाटोस्थित एन्फा कम्पेक्समा हुनेछ । दुई खेल मध्य एक खेल निकै नै रोमाञ्चक हुने अनुमान गर्न सकिन्छ । किनकी आज लिगमा अपरजित दुई टोली भिड्दै छन् । 

बिहान ११ बजे हुने पहिलो खेलमा पुलिसले फ्रेन्ड्स क्लबसँग प्रतिस्पर्धा गर्नेछ । दुवै टोलीको लक्ष्य स्पष्ट जित निकाल्दै अंक तालिकामा सुधार गर्ने हुने छ । पुलिस ७ खेलबाट ११ अंक सहित तालिकाको पाँचौ स्थानमा छ । फ्रेन्ड्स ५ अंक सहित लिगको ११ औं स्थानमा छ ।

दिउँसो साढे २ बजे हुने दोस्रो खेलमा उपाधि दाबेदार दुई टोली मनाङ मस्र्याङ्दी क्लब र त्रिभुवन आर्मी क्लब आमने सामने हुनेछन् । दुवै टोलीलाई उपाधि होड बलियो बनाउन जित आवश्यक छ । शीर्ष स्थानको मनाङको २१ अंक छ । आर्मी १७ अंक सहित तालिकाको चौथो स्थानमा छ । 

आर्मी र मनाङको नतिजाले लिगको समीकरणमा निकै ठूलो भूमिका खेल्छ । मनाङ विजयी भएको खण्डमा आर्मीको उपाधि दावेदारी लगभग समाप्त हुनेछ । मनाङले जित दर्ता गरेमा उपाधि दावेदारीमा बलियो स्थान बनाउनेछ । अंक बराबरीको अवस्थामा हेड टु हेड नियम लागु हुने कारण पनि यस खेलको नतिजा थप महत्त्वपूर्ण बनेको छ ।