आजका अखबार : देउवा–पौडेल विवादले महासमिति दिशाहिन !

काठमडौं- राजधानीबाट प्रकाशित शुक्रबारका राष्ट्रिय दैनिक अखबारहरुले कांग्रेसभित्र चर्किएको विवाद र प्रधानन्यायाधीशका लागि चोलेन्द्र शम्शेर जबरा सिफारिस भएको विषयलाई मुख्य समाचार बनाएका छन् । 

प्रधानन्याधीशमा जबरा सिफारिस भएको विषयलाई एङ्कर न्यूज बनाएको आजको कान्तिपुर दैनिकले देउवा पौडेल चर्काचर्की शीर्षकमा मुख्य समाचार छापेको छ ।

वरिष्ठ नेता रामचन्द्र पोडेलले सभापति देउवाकै कारण पार्टी यति धेरै कमजोर भएको भन्दै आलोचना गरेका छन् भने देउवाले आफूलाई मात्रै दोष दिन नमिल्ने भन्दै पौडेलविरुद्ध आक्रोश पोखेका छन् । कांग्रेस महासमिति बैठक शनिबारबाट सुरु हुँदैछ । तर, नेताहरुको चर्का चर्कीले यसले पनि कांग्रेसलाई दिशा दिनेमा शंका गर्न थालिएको कान्तिपुरले लेखेको छ । 

आजको नयाँ पत्रिकाले पनि कांग्रेस बैठकमा देउवा–पौडेल जुहारी शीर्षकमा मुख्य समाचार छापेको छ ।

बिहीबारको बैठकमा वरिष्ठ नेता पौडेलले चुनाव गराएको जस लिने, तर पार्टीले हारेको जिम्मा नलिने भन्दै प्रश्न गरेका थिए भने देउवाले चुनावमा आफै हारेकाले नेतृत्वलाई गाली गर्न नसुहाउने तर्क गरेका थिए । यस्तै आजको अन्नपूर्ण पोस्ट्ले भने कांग्रेस प्रतिवेदनमा मतभेद शीर्षकमा खबर लेखेको छ ।
 
यस्तै प्रधानन्यायाधीशमा चोलेन्द्र शम्शेर सिफारिस भएको विषयलाई पनि आजका पत्रपत्रिकाले विशेष महत्वका साथ छापेका छन् । नयाँ पत्रिकाले त मुख्य समचार नै बनाएको छ। उसले प्रधानन्यायाधीशमा निर्विकल्प सिफारिस शीर्षकमा खबर लेखेको छ ।

उसले चोलेन्द्र सर्वोच्चको न्यायाधीश हुँदा वामपन्थी सांसदले विपक्षमा मत हालेका थिए, यसपटक के गर्छन ? भनेर प्रश्न समेत गरेको छ। नयाँ पत्रिकाले चोलेन्द्रले विशेष अदालतमा हुँदा भ्रष्टाचारसम्बन्धी ३६ मध्ये ३५ मुद्दामा सफा दिएको पनि उल्लेख गरेको छ । 

आजको नागरिक दैनिकले पनि चोलेन्द्र प्रधानन्यायाधीशमा सिफारिस भएको विषयलाई प्राथमिकताका साथ छापेको छ । नागरिकले यो विषयसँगै भारतले दिएको ऋणमा सर्तै सर्त राखिदा रकम नै खर्च गर्न नसकिने अवस्था बनेको विषयलाई मुख्य समाचार बनाएको छ ।

अन्नपूर्ण पोस्ट्ले भने जाजरकोटमा अहिले पनि ७४ प्रतिशत बालबिबाह हुने गरेको खुलासा गरेको छ भने सरकारले साना किसानको ऋण मिनाहा गरेको विषयलाई पनि प्राथमिकताका साथ प्रकाशित गरेको छ।