पिस फेडेरेसनको झुटविरुद्ध कड्किए गगन

काठमाडौँ- विवादित संस्था युनिर्भल पिस फेडेरेसन (युपिएफ)ले नेपालका बारेमा गलत प्रचार गरेको भन्दै नेपाली कांग्रेसका नेता गगन थापाले कडा आपत्ति जनाएका छन् । सामाजिक सञ्जाल ट्विटरमा ट्विट गर्दै उनले विवादित एसिया प्यासिफिक समिट सम्बन्धि भिडियो झुटको पुलिन्दा भएको टिप्पणी गरेका छन् ।

उनले उक्त भिडियोको सुरुवातमै १३ बर्ष अगाडि नोबेम्बर २२, २००५ मा नेपालमा युनिभर्सल पिस फेडरेशन (युपिएफ) उद्घाटन भ्रमण भएको र उक्त दिनलाई नेपालको संसदले राष्ट्रिय शान्ति दिवस घोषणा गरेको भनिएकोमा आपत्ति जनाएका छन् । 

“युनिभर्सल पिस फेडरेशन उद्घाटन टुर कहिले, कसले ग¥यो त्यो विषयमा हाम्रो कुनै चासो छैन, तर सोहि दिनलाई नेपालको संसदले राष्ट्रिय शान्ति दिवस घोषणा गरेको भनेर जुन भ्रम सिर्जना गर्न खोजिएको छ, त्यो आपत्तिजनक छ,” उनले ट्वटिरमा लेखेका छन् । नेता थापाले थप प्रष्ट्याउदै लेखेका छन्, “पहिलो कुरा त नेपालमा नोबेम्बर २२, २००५ अर्थात वि.सं २०६२ मंसिर ७ गते संसद नै थिएन । हुँदै नभएको संसदले घोषणा गर्ने कुरै रहेन । दोस्रो कुरा नेपालको संसदले पछि पनि कहिल्यै उक्त दिनलाई शान्ति दिवस भनेर घोषणा गरेको छैन । यो आफैमा झुट, कपोलकल्पित र बदनियतपुर्ण छ ।”

यस्ता गलतप्रचार गरेर नेपालको सम्मानित संसदको दुरुपयोगसँगै अन्तर्राष्ट्रिय समुदायमा समेत बदनाम गर्न खोजिएको भन्दै उनले आपत्ति जनाएका छन् । उक्त भिडियो क्लिपमा नेपाल सरकार र युपिएफले संयुक्त रुपमा समिटको आयोजा गरेको मात्रै भनिएको छैन युपिएफ–एसियाका अध्यक्ष एकनाथ ढकालले डिसेम्बर १ मा नेपाललमा भएको समिटमा आफैलाई ‘जिससकी एकमात्र छोरी ‘घोषणा गरेकी हक जा हन मुनलाई ’ सवैले जिससकी छोरीको रुपमा स्वीकार गरेको र सबै नेपालीले बैधानिकता दिएको भनेका छन । 

भिडियोमा नेपालमा इश्वरिय राज्य स्थापना गरिएको भनिएको छ । यो विषयमा पनि नेता थापाले चर्को विरोध गरेका छन् र उनले यस्ता भ्रामक भिडियो मार्फत नेपाल र नेपाली जनताको घोर अपमान गरेको भन्दै आक्रोश पोखेका छन् । उनले धर्म परिवर्तन गर्ने, भ्रामक प्रचार गर्ने यस्ताखाले  संस्थामाथि कारबाही गर्न समेत माग गरेका छन् ।