जनकपुर ओर्लिए आदित्यनाथ, लालबाबुले गरे स्वागत

जनकपुर- भारत उत्तर प्रदेशका मुख्यमन्त्री योगी आदित्यनाथ बुधबार जनकपुर आइपुगेका छन् । रामजानकी विवाहोत्सव समारोहमा सहभागी हुन योगी जनकपुर आएका हुन् । लखनउबाट विशेष विमानबाट जनकपुर अवतरण गरेका उनलाई प्रदेश २ का मुख्यमन्त्री लालबाबु राउतले विमानस्थलमा स्वागत गरेका छन् ।

योगीलाई स्वागत गर्न मुख्यमन्त्री राउतसहित मन्त्रिमण्डलका सदस्य एवं सभामुख तथा उपसभामुखको टोलीले स्वागत विमानस्थल पुगेका थिए । विमानस्थलमा अवतरण गरिसकेपछि मुख्यमन्त्री योगीको सोझै जानकी मन्दिर पुगेर पूजाअर्चना गर्ने कार्यक्रम तय भएको छ । जानकी मन्दिरमा पूजाअर्चना गरिसकेपछि उनी प्रदेश सरकारले आयोजना गरेको दिवा भोजमा सरिक हुनेछन् ।

प्रदेश २ सरकारले योगीको सम्मानमा मधेस भवनमा दिवा भोजको आयोजना गरेको हो । दिवा भोजमा योगीसहित करिब १ हजार ५ सय साधुसन्तसमेत सहभागी हुने बताइएको छ । योगीको सम्मानमा आयोजना गरिने दिवा भोजमा प्रदेश सरकारले ५६ प्रकारको व्यन्जनको व्यवस्था गरेको कानुनमन्त्री यादवले बताएका छन् ।

मधेस भवनमा प्रदेश सरकारले योगीको सम्मानमा मिथिला संस्कृति झल्किने सांगीतिक कार्यक्रमको समेत आयोजना गरेको छ । सांस्कृतिक कार्यक्रममा मैथिली क्षेत्रका चर्चित कालाकार शारदा सिन्हा, सुनिल मल्लिक र मैथिली ठाकुरले प्रस्तुति गर्ने बताइएको छ ।

मधेस भवनको कार्यक्रमपछि उत्तर प्रदेशका मुख्यमन्त्री योगीे रंगभूमि मैदानमा आयोजना हुने रामजानकीको स्यंभर कार्यक्रममा सहभागी हुनेछन् । करिब एक घन्टासम्म चल्ने स्वयंभर कार्यक्रममा सहभागी भइसकेपछि योगीको साँझ पौने ६ बजे लखनउ फर्किने कार्यक्रम रहेको बताइएको छ ।