बार्सिलोनाका लागि डेम्बेले आवश्यक : मेस्सी

एजेन्सी- बार्सिलोनाले यस सिजनको अन्त्यमा नयाँ स्टार खेलाडी भित्र्याउन उसमान डेम्बेलेलाई बेच्न सक्ने चर्चा चलेसँगै बार्सिलोनाका कप्तान लियोनल मेस्सीले टिममा उनको आवश्यकता रहेको बताएका छन् । 

केहि समयअघि कप्तान मेस्सीले पनि फ्रान्सका २१ बर्षीय विंगर डेम्बेलेलाई बेच्न सुझाव दिएका थिए । तर, अहिले उनी टोलीका लागि महत्वपूर्ण रहेको बताएका छन् । 

पछिल्लोपटक ला लिगामा इस्पान्योलविरुद्ध अवे मैदानमा भएको खेलपछि मिडियासँग प्रतिक्रिया दिँदै मेस्सीले यस्तो बताएका हुन् । बार्सिलोनाले ४-० ले जितेको खेलमा मेस्सीले २ गोल फ्रि किकबाट गरेका थिए भने १ गोलका लागि पास मिलाएका थिए । 

सोही खेलमा डेम्बेलेले मेस्सीको पासमा गोल गर्दा लुइस स्वारेजका लागि असिस्टसमेत गरेका थिए । सो खेलपछि मेस्सीलाई पत्रकारले ‘बार्सिलोनाले डेम्बेलेलाई बेच्ने तयारी गरेको’ विषयमा सोधेका थिए । 

‘क्लबको योजना के छ, त्यो मलाई थाहा छैन । तर, डेम्बेले टोलीका लागि आवश्यक छन्,’ मेस्सीले भने । मेस्सीले डेम्बेले युवा रहेको र उनीसँग प्रशस्तै सम्भावना रहेको पनि बताए । बार्सिलोनाले डम्बेलेलाई अघिल्लो सिजन जर्मन क्लब बोरुसिया डर्टमुन्डबाट १ सय ५ मिलियन युरोमा अनुबन्ध गरेको थियो । 

आगामी समर सिजनमा बार्सिलोनाले आफ्ना पूर्वस्टार नेइमार फर्काउन चाहेको र त्यसका लागि उसले डेम्बेले बेच्ने तयारी गरेको खबर आइरहेका छन् । बार्सिलोनाले डेम्बेले बेचे इंग्लिस क्लब आर्सनलले विशेष रुपमा अनुबन्ध गर्न तयारीमा रहेका खुलासा भएको छ ।