मुख्यमन्त्री कार्यालयमा प्रदर्शन, प्रधानमन्‍त्रीको पुत्ला दहन

धनगढी-बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको न्यायका लागि आन्दोलनरत धनगढीका युवाहरुले प्रधानमन्त्री केपीशर्मा ओलीको पुत्ला दहन गरेका छन् ।

मंगलबार मध्यान्न १२ बजेतिर धनगढीस्थित सुदूरपश्चिम प्रदेशको मुख्यमन्त्री कार्यालयको गेटमा प्रधानमन्त्रीको पुत्ला दहन गर्नुका साथै सरकारविरुद्ध प्रदर्शन गरेका छन् । निर्मलाका हत्यारालाई सार्वजनिक गर्न नसक्ने सरकार चाहिदैन भन्दै युवाहरुले निर्मलालाई न्याय माग्दै करिव एक घण्टा नाराबाजीसमेत गरे ।

‘सरकार भेटियो न्याय भेटिएन’ लेखिएको निर्मला पन्तको तस्विरसहितका पोष्ट टाँस्दै युवाहरुले सरकार आफै हत्यारा लुकाएर नक्कली हत्यारा खडा गर्न लागेको आरोपसमेत लगाए । 



निर्मलाको बलात्कारपछि हत्या भएको साढे ४ महिना बितिसक्दा सम्म पनि हत्यारा पत्ता लगाउन नसक्ने सरकारको उनीहरुले राजीनामासमेत मागे । प्रधानमन्त्री, गृहमन्त्री तथा मुख्यमन्त्रीविरुद्ध आक्रोषित बनेका युवाहरु र प्रहरीका बीचमा केहिबेर मुठमेडसमेत भएको छ । 

प्रधानमन्त्रीको पुत्ला र टायर खोस्ने क्रममा तथा गेटमा पोष्टर टाँस्ने क्रममा प्रहरीले हस्तक्षेप गरेको हो । नेपाली प्रहरीको टोलीले नियन्त्रणमा लिन नसकेपछि सशस्त्र प्रहरीको टोली पुगेको थियो । 
आन्दोलनकारीले प्रहरीको हस्तक्षेप बिरुद्ध पनि नाराबाजी गरे । केहि बेर यातायातका साधानसमेत चल्न रोक लगाईएको थियो । 

प्रहरीले दुईजना कुखुरा चोरेको आरोप लागेका युवाहरुलाई निर्मलाको हत्यारा सावित गर्न लागेको भन्दै युवाहरु झन आन्दोलित बनेका हुन् ।