प्रदेश– २ मा आज र भोलि सार्वजनिक बिदा

धनुषा- प्रदेश २ सरकारले विवाह पञ्चमी मनाउन पनि सार्वजनिक बिदा दिएको छ  । प्रदेश सरकारले आज मङ्सिर २५ र भोलि २६ गते सार्वजनिक बिदा दिएको हो ।

विवाहपञ्चमी महोत्सव भव्य मनाउन भन्दै बिदा दिइएको प्रदेश सरकारले जनाएको छ । विवाहपञ्चमीमा लाखौँ भक्तजनको सहभागिता हुने अनुमान सरकारको छ छ। विवाहपञ्चमीमा सहभागी हुन हजारौँ भारतीय जनकपुर आएका छन् । 

जनकपुरधाममा जारी सप्ताहव्यापी महोत्सवको पाँचौ दिन मंगलबार मटकोरको विधि  हुँदैछ । चौथो दिन सोमबार राममन्दिरको रामवागमा भगवान् रामको तिलकोत्सव सम्पन्न भएको छ । यस पटक जानकी मन्दिरबाट एक हजार एक भार (कोशेली) राममन्दिरमा भगवान् रामको तिलकका लागि गएका थिए ।    

 अयोध्याबाट ३५० जना जन्ती जनकपुर आए

 भारतको रामजन्मभूमि अयोध्याबाट ३५० को सङ्ख्यामा जन्ती जनकपुरधाम आइपुगेका छन् । जन्तीलाई जानकी मन्दिरमा भव्य स्वागत गरिएको छ । 

जनकपुरधाम उपमहानगरपालिकाले विवाह पञ्चमीलाई भव्यरुपमा मनाउन सम्पूर्ण नगरवासीलाई आग्रह गरेको छ । नगरपालिकाद्वारा जारी गरिएको प्रेस विज्ञप्तिमा २५ र २६ गते जनकपुर शहरमा दीपावली मनाउन सर्वसाधरणलाई आग्रह गरिएको छ । उपमहानगरपालिकाभित्रको सम्पूर्ण विद्यालयको पठनपाठन बन्द गरी भव्यरुपमा दीपावली मनाउन आग्रह गरिएको छ ।