बल्ब खरिद प्रकरणमा जनकपुरधाम उपमहानगरपालिकालाई अख्तियारको पत्र

जनकपुरधाम- एलइडी बल्ब खरिदमा भ्रष्टाचार भएको आरोप लागि रहेको बेला अख्तियार दुरुपयोग अनुसन्धान आयोगले जनकपुरधाम उपमहानगरपालिकालाई पत्र पठाएको छ। 

अख्तियारले बल्ब खरिद प्रक्रियाबारे स्पष्ट गर्न उपमहानगरपालिकालाई पत्र पठाएको बताइएको छ। एलइडी बल्बसहित अन्य सामग्री कुन प्रक्रिया अपनाइ खरिद गरिएको भन्दै उपमहानगरपालिकासँग अख्तियारले जबाफ मागेको कार्यालय स्रोतको दाबी छ।

उपमहानगरपालिका स्रोतका अनुसार एलइडी बल्ब खरिदमा अनियमितता भएको भन्दै दायर उजुरीको आधारमा अख्तियारले उपमहानगरपालिका कार्यालयसँग जबाफ माग्दै पत्र पठाएको हो । गत आर्थिक वर्षमा सडक बत्तिका लागि उपमहानगरपालिकाले ८५ लाख खर्चेर एलइडी बल्ब खरिद गरिएको बताएको थियो।

उपमहानगरपालिकाले १ सय ८० देखि २ सय रुपैयाँ पर्ने बल्ब दोब्बर मूल्यमा खरिद गरिएको बताएपछि अनियमितता भएको आकलन गरिएको थियो । बल्ब खरिदमा अनियमितता भएको भन्दै उपमहानगरपालिकाका कतिपय वडाअध्यक्षहरुले समेत आरोप लगाएका थिए ।

गत आर्थिक वर्षको जेठ महिनासम्म उपमहानगरपालिकाले सडक बत्ती जडानका लागि ८५ लाख खर्च गरेर खरिद गरेको बल्ब एक वर्ष नपुग्दै फ्युज भएको थियो । उपमहानगरपालिकाले सडक बत्तीका लागि ८५ लाख खर्चेर कोटेशनमार्फत एलइडी बल्ब खरिद गरेको थियो ।

बल्ब लगायतका सामग्री खरिद गर्न उपमहानगरपालिकाले सत्या इन्टरप्राइजेजसँ सम्झौता गरेको थियो । इन्टरप्राइजेजसँग भएको सम्झौता अनुसार १४ वाटको एलइडी बल्ब ४ सय ७५ रुपैयाँ प्रतिगोटा, १ एमएमको तार १ हजार ६ सय रुपैयाँ प्रतिक्विन्टल, डेढ एमएमको तार २ हजार  ५ सय रुपैयाँ प्रतिक्विन्टल, बेरिएको तार ९ सय ५० रुपैयाँ प्रतिक्विन्टल र ६ एमएमको तार ४५ रुपैयाँ प्रतिमिटरको दरभाउमा खरिद गरिएको उपमहानगरपालिकाको जिन्सी शाखाले जनाएको थियो ।

उपमहानगरपालिकाका २५ वडाका लागि ५ हजार ८ सय ९० थान एलइडी बल्ब, १ हजार ९ सय ८० सामान्य बल्ब, ६ हजार ४ सय होल्डर, ८३ क्वाइल तार, ५ हजार ३ सय ३० थान क्याप पठाएको थियो ।