मनाङ लिगको सातौं खेलमा पनि अपराजित

काठमाडौं- पल्सर सहिद स्मारक ‘ए’ डिभिजन लिग अन्तर्गत मनाङ मस्र्याङदी क्लबले शीर्ष स्थान कायमै राखेको छ । एन्फा कम्प्लेक्समा आइतबार भएको खेलमा शीर्ष स्थानको मनाङले पुछारमा रहेको मछिन्द्र क्लबलाई १-० ले पराजित गर्दै लिगमा आफ्नो अपराजित यात्रा कायमै राखेको हो । 

पहिलो हाफ गोलरहित बराबरीमा सकिएको खेलमा मनाङले दोस्रो हाफमा गोल गरेको थियो । मनाङले खेलमा गोल गर्न निकै समय पर्खनु पर्यो । खेल सकिन ६ मिनेट बाँकी हुँदा मनाङका लागि विदेशी खेलाडी आफिज ओलावलेले गोल गरेका थिए । 

दोस्रो हाफमा मैदान प्रवेश गरेका ओलावाले आफिजले मैदान प्रवेश गरेको केहि समयमा गोल गरेका थिए । पहिलो हाफको दोस्रो मिनेटमा मच्छिन्द्रका विशाल राईको फितलो प्रहार मनाङका गोलरक्षक विशाल श्रेष्ठले सहजै बचाए । चौथो मिनेटमा मनाङका दिपक राईको प्रहार गोलरक्षक दिप कार्कीले बचाए । 

२१औं मिनेटमा डोनाको पासमा अन्जन विष्टको प्रहार दोस्रो बारबाट थोरै बाहिरियो । २९औं मिनेटमा मच्छिन्द्रका अजित गुरुङले गोल गर्न सकेनन् । ३४औं मिनेटमा मनाङका कप्तान विराज महर्जनको पासमा अन्जनको हेडर गोलरक्षक दिप कार्कीले सहजै बचाए । 

यस जितसँगै मनाङको अंक २१ पुगेको छ । दोस्रोस्थानमा रहेको संकटाको समान ७ खेलमा १८ अंक छ भने तेस्रो स्थानमा रहेको आर्मीको १७ र चौथो स्थानमा रहेको थ्री स्टारको १६ अंक छ ।