ब्राजिलियन खेलाडीलाई पछि पार्दै रोहित उत्कृष्ट खेलाडी

काठमाडौं- नेपाली राष्ट्रिय फुटबल टिमका भरपर्दा मिडफिल्डर रोहित चन्द इन्डोनेसियन लिग वनमा सर्वोत्कृष्ट खेलाडी घोषित भएका छन् । अघिल्लो साता इन्डोनेसिया लिगको उत्कृष्ट खेलाडीको मनोनयनमा परेका रोहित अन्तत लिगको उत्कृष्ट खेलाडी घोषित भएका हुन् । 

सार्वजनिक गरेको मनोनयनमा पर्सिजा जाकार्ताका मिडफिल्डर रोहितसँगै अन्य दुई खेलाडी रहेका थिए । रोहितसँगै उत्कृष्ट खेलाडीको मनोनयनमा पर्सबायाका ब्राजिलियन फरवार्ड डेविड डे सिल्भा र पीएसएम मकासरका डच मिडफिल्डर विलेम जान प्लम रहेका थिए । 

उनले दुबै खेलाडीलाई पछि पार्दै उपाधि जितेका हुन् । रोहितको लगातार उत्कृष्ट प्रदर्शनको मदतले पर्सिजाले लिग उपाधि जित्न सफल रहयो । लिगको ३१ खेल खेलेका रोहितले ३ गोल र २ असिस्ट प्रदान गरे । 

रक्षात्मक मिडफिल्डरको भूमिका निभाएका रोहितले गोलको तथ्यांकमा उल्लेख्य प्रदर्शन नगरेपनि उनले मैदानमा भने निकै राम्रो प्रदर्शन गरेका थिए । लिगको उपाधि आइतबार उनकै टोली पर्सिजा जकार्ताले जितेको छ । अन्तिम खेलमा मिट्रा कुकारलाई २-१ ले पराजित गर्दै पर्सिजाले लिग उपाधि जितेको हो ।