पोखरीको डिलमा विद्यार्थीको कला-शिल्प

गोदार (धनुषा)- नवमिथिला फाउण्डेशनको आयोजनामा कला र शिल्प (आर्ट एण्ड क्राफ्ट) प्रतियोगिता सम्पन्न भएको छ । जनकपुरधामस्थित नोचा पोखरी डिलमा विद्यार्थीले कला–शिल्प प्रदर्शन गरेका छन् । 

त्यस अवसरमा जनकपुरधाम उपमहानगरका प्रमुख मनोजकुमार साहले विद्यार्थीका लागि आफ्नो क्षमता र सीप देखाउने यो राम्रो अवसर भएको बताए । उनले सहभागी विद्यार्थीलाई बधाइ दिँदै नवमिथिला फाउण्डेशनलाई यस्ता कार्यक्रमलाई निरन्तरता दिन सुझाव दिए।

प्रतियोगितामा जनकपुरधामका निजी तथा सामुदायिक विद्यालयका ३५ जना छात्रछात्रा सहभागी थिए । प्रतियोगिताका प्रथम, द्वितीय र तृतीयलाई आगामी फागुन १२ गते आयोजना हुने जनकपुर साहित्य महोत्सवमा पुरस्कृत गरिने आयोजक संस्थाका अध्यक्ष अमित साहले जनाए । प्रथम हुनेलाई रु २१ हजार, द्वितीयलाई रु ११ हजार र तृतीयलाई रु पाँच हजार एक सय नगदसहित कदरपत्र प्रदान गरिने छ ।