कहिलेसम्म हो यो सास्ती ?

कलंकी नागढुंगा सडक निर्माणमा विलम्ब हुँदा त्यस क्षेत्रका बासिन्दाले व्यहोरिरहेको धुवाँ, धुलो, हिलो र सडक जामलाई शब्दमा बयान गर्न सकिँदैन । धुवाँधुलोका कारण सडक आसपासका बस्ती चौबिसै घन्टा तुवाँलोले ढाक्ने गरेको छ भने केही मिटर पर रहेका गाडी देख्न मुस्किल पर्छ ।

फराकिलो बनाउन थालेको तीन वर्ष बित्दा पनि निर्माण सम्पन नहुँदा यस क्षेत्रका बासिन्दा त हैरान भएका छन् । देशका विभिन्न भागबाट राजधानी छिर्ने मुख्य नाकाको स्तरोन्नतिमा भइरहेको ढिलाइले हाम्रो सरकारलाई गिज्याइरहेको छ भने सडक निर्माणको जिम्मेवारी लिएको ठेकेदार कम्पनी शर्मा सैलुङ कान्छाराम जेभी राज्यशक्तिको उपल्लो निकायसम्म गतिलो पहुँच राखेर कतिसम्म अनुत्तरदायी रहेछ भन्ने स्पष्ट पारेको छ ।

ट्राफिक प्रहरीका अनुसार यो सडकमा दैनिक १५ हजारभन्दा बढी गाडी आवतजावत गर्छन् ।