आजका अखबार : सांसद आवास हडपिने, मन्त्रीनिवास भत्काइने

काठमाडौं- राजधानीबाट प्रकाशित शुक्रबारका राष्ट्रिय दैनिक अखबारहरुले आलोचकप्रति प्रधानमन्त्री आक्रोशित बनेको देखि मन्त्री निवास भैसेपाटी सार्नेसम्मका विषयलाई प्राथमिकतामा पारेका छन् । 

आजको कान्तिपुर दैनिकले आलोचकप्रति आक्रोश शीर्षकमा मुख्य समाचार छापेको छ । प्रधानमन्त्री केपीशर्मा ओली विवादित क्रिस्चियन संस्थाले गरेको धार्मिक कार्यक्रमको विरोधमा बोलेका बुद्धिजीवी प्रति क्रोधित भएका छन् ।

उनले केहि बुद्धिजीवीको अभिब्यक्ति अत्यन्त असभ्य र तल्लो स्तरको भएको भन्दै उनीहरुको पोल खोलिदिए के हुन्छ ? भनेर समेत चेतावनी दिएका छन् । प्राध्यापाक कृष्ण खनालले ओलीमा पञ्चायतको जति पनि धैर्य नदेखिनु मुलुककै लागि चिन्ताको विषय भएको भनेर टिप्पणी गरेको समाचारमा उल्लेख छ । 

यस्तै कान्तिपुरले मन्त्री निवास भत्काएर अतिथिगृह शीर्षकमा एङ्कर न्यूज छापेको छ ।

पूल्चोकका मन्त्री क्वार्टर भएका ठाउँमा १० वटा राजकीय अतिथिगृह बनाउने सांसद आवासका लागि छुट्याइएका जग्गामा मन्त्रीका लागि २७ निवास बनाउने निर्णय भएको छ । मन्त्रिपरिषद्ले भैसेपाटीमै मुख्यमन्त्री र प्रदेश प्रमुखलाई १४ निवास र सम्पर्क कार्यालय बनाइउने निर्णय गरेको थियो । 

यसै विषयलाई आजको अन्नपूर्ण पोस्ट्ले सांसद आवास हडपेर मन्त्रीनिवास शीर्षकमा मुख्य समाचार बनाएको छ । सांसदका लागि आवास बनाउने भनेर २०५५ सालमै संसद सचिवालयको नाममा लिइएको जग्गामा मन्त्रीनिवास बनाउने निर्णय गरिएको हो ।

१ सय ४९ रोपनी क्षेत्रफलको यो जग्गामा मन्त्रीसहित राष्ट्रिय सभाका अध्यक्ष, उपाध्यक्ष, प्रतिनिधि सभाका सभामुख उपसभामुखका लागि २७ वटा भवन बन्ने भएको छ । मुख्यमन्त्री र प्रदेश प्रमुखका लागि पनि आवास निर्माण हुने भएको पत्रपत्रिकाले लेखेको छन् । 

निर्मला हत्या प्रकरणमा प्रहरीले अपराधीनजिक पुगेको भनि दावी गरेको विषयलाईपनि अन्नपूर्णले विशेष महत्वका साथ प्रकाशित गरेको छ । आजको नयाँ पत्रिकाले भने यसै विषयलाई मुख्य समाचार बनाएको छ । 

'प्रहरी अनुसन्धान भन्छ- निर्मलालाई सामुहिक बलात्कार' शीर्षकमा खबर लेखेको नयाँ पत्रिकाले दिलीप विष्टलाई पक्राउ गर्दा पत्रकार सम्मेलन गरेको प्रहरी यसपटक भने मौन बसेको जनाएको छ । डिएनए रिपोर्ट मिले मात्रै सार्वजनिक गर्ने तयारी भएको समाचारमा उल्लेख छ । कञ्चनपुरबाट पक्राउ परेका चारजनालाई हवाइजहाजमा काठमाडौं ल्याइएको र एकजनालाई काठमाडौंमै गिरफ्तार गरिएको थियो । 

आजको नागरिक दैनिकले भने सञ्चारमन्त्री गोकुल बास्कोटाको आक्रोशलाई प्राथमिकताका साथ छापेको छ ।

मन्त्री बास्कोटाले प्रधानमन्त्रीलाई खुइल्याउने गरि समाचार बनाएको भन्दै आक्रोश पोखेका थिए । हिजो गिरिजाप्रसाद कोइरालाले त्यहि अवार्ड थाप्दा शान्ति दुत हुने आज केपी ओलीले थाप्दा अपराधी कसरी हुन्छ भनेर सञ्चारमाध्यमसँग आक्रोश पोखेका थिए । उनले एसिया प्यासेफिक समिटका विषयमा गरिएको विरोध पनि अनाआवाश्यक भनेर टिप्पणी गरेको समाचारमा उल्लेख छ ।  

यस्तै नागरिकले प्रधानन्यायाधीश ओमप्रकाश मिश्रको चारमहिने कार्यकालको समिक्षा गरेको छ । उसले भ्रष्टाचारका मुद्दालाई प्रधानन्यायाधीश मिश्रले पन्छाउने काम गरेको समाचारमा जनाइएको छ ।