मन्दिरको जग्गा बेचेको आरोपमा महन्त पक्राउ

जनकपुरधाम- जनकपुरस्थित रत्नसागर मन्दिरका महन्त वैकुण्ठ दास पक्राउ परेका छन् ।

किर्ते जालजासी गरी मठमन्दिरको जग्गा बेचविखन गरेको आरोपमा  महन्त दासलाई महानगरीय प्रहरी परिसर काठमाडौँले पक्राउ गरेको हो । जिल्ला अदालत धनुषाले उनलाई पक्राउ गर्न आदेश जारी गरेपछि उनी फरार भएका थिए ।

जनकपुरधाम–८ स्थित हजारी जनक विद्यापीठको नाउँमा रहेको जग्गा महन्त दास र उनका सहयोगी अशोक शर्माले मिलोमतो गरी किर्ते गरेको आरोप छ । दासका सहयोगी शर्मालाई प्रहरीले यसअघि नै पक्राउ गरी सकेको छ । साढे दुई अर्बभन्दा बढी मूल्य बराबरको विद्यापीठले भोगचलन गर्दै आइरहेको गुठीको उक्त जग्गाको संरक्षक दास र मोही शर्मालाई बनाइएको छ । 

हजारी जनक विद्यापीठले भोगचलन गर्दै आइरहेको साढे दुइ बिघा जग्गा महन्त दासले नक्कली लालपुर्जा बनाइ हडपेको भन्दै प्राचार्य विजय चौधरीले अदालतमा मुद्दा दायर गरेका थिए । केन्द्रीय गुठी संस्थानले विद्यापीठलाई उपलब्ध गराएको उक्त जग्गामा क्याम्पस व्यवस्थापनले घेराबेरा गरी भौतिक संरचनासमेत निर्माण गरिसकेको छ ।

२०५० सालदेखि विद्यापीठले भोगचलन गर्दै आइरहेको सिट नम्बर १३५४÷१४ को कित्ता नम्बर ६२ को २ कठ्ठा ११ धुर तथा सिट नम्बर १३५४र१५ को कित्ता नम्बर १, २, २८ र ४९ को २ बिघा ८ कठ्ठा १४ धुर जग्गा फर्जीलालपुर्जा बनाइ महन्त दासका सहयोगी शर्माले बेच्न खोजेका थिए ।