एपिएफको दोस्रो जित, एनआरटी अझै जित विहिन

काठमाडौं- पल्सर सहिद स्मारक ‘ए’ डिभिजन लिग अन्तर्गत एपीएफले आफ्नो दोस्रँे जित निकालेको छ । सातदोबाटोस्थित एन्फ कम्प्लेक्सका मंगलबार  भएको पहिलो खेलमा न्यू रोड टिम (एनआरटी) लाई २-१ गोलले पराजित गर्दै लिगमा दोस्रो जित निकालेको हो । 

एपीएफको जितका लागि युवराज खड्का र सुदिप सिख्राकारले एक एक गोल गरे । खेलको तेस्रो मिनेटमा नै अग्रता लिएको एपिएफका लागि युवराजले गोल गरेका थिए । 

उनले श्याम नेपालीले दायाँ विङबाट दिएको लो क्रसलाई पेनाल्टी क्षेत्रभित्रबाट सहजै गोल गरेका थिए । तर, १५ औं मिनेटमा राजेश परियारले बराबरी गोल गर्दै एनआरटीलाई खेलमा फर्काउने प्रयार गरेका थिए । उनले कप्तान प्रवीन सैंजुले दिएको पासमा गनेल गर्दै खेल बराबरीमा ल्याए । 

पहिलो हाफ १-१ को बराबरी खेलेको खेलमा थप गोल गर्न दुर्ब टोलीलाई निकैनै संर्घस गर्नु पर्यो । दोस्रो हाफको सुरुवातमा नै दुबै टोली केहि सुन्दर मौका गुमाएका थिए । 

तर, दोस्रो गोल गर्न संर्घस गरिरहेको एपीएफले ७२ औं मिनेटमा पेनाल्टी पायो । असिम गुरुङले पेनाल्टी क्षेत्रभित्र युवराज खड्कालाई लडाएपछि रेफ्रीले पेनाल्टी दिएका थिए । उक्त पेनाल्टीलाई सुदीप सिख्राकारले गोलमा परिणत गरे । 

यस जितसँगै एपीएफको ६ खेलमा ७ अंक छ भने एनआरटीको १ अंक सहित अंक तालिकाको पुछारमा छ ।