इलाममा १२ दिने पर्यटन महोत्सव हुने

काठमाडौं- पर्यटन प्रवर्द्धनका लागि इलाममा पर्यटन महोत्सव हुने भएको छ । प्रदेश नं १ का चार जिल्ला झापा, इलाम, पाँचथर र ताप्लेजुङको पर्यटन प्रवर्द्धन गर्ने उद्देश्यले इलाममा महोत्सव हुन लागेको मंगलबार राजधानीमा आयोजित पत्रकार भेटघाट कार्यक्रममा जानकारी दिइएको छ । आगामी पुस ५ देखि १६ गतेसम्म सञ्चालन हुने महोत्सवको नाम‘मेची क्षेत्र पर्यटन महोत्सव इलाम–२०७५’ राखिएको मेचि पहाडी क्षेत्र पर्यटन प्रवर्द्धन विकास समितिका केशव धौरालीले जानकारी दिए ।

यो महोत्व नेपालका लागि नयाँ शैलीको हुने भन्दै उनले यसपटक इलामले आयोजना गर्ने महोत्सवमा झापा, पाँचथर र ताप्लेजुङमा पर्यटन क्षेत्रमा काम गर्ने संस्था सहआयोजक बन्ने र अर्को वर्षको महोत्सवका लागि लोगो हस्तानान्तरण गरिने बताए । 

चार जिल्लालाई पर्यटकीय गन्तव्यका रूपमा विस्तार गर्ने तथा पर्यटनको माध्यमबाट स्थानीय जीविकोपार्जनमा आत्मनिर्भर बनाउने उद्देश्यले महोत्सव गर्न लागिएको महोत्सवको आयोजक इलाम पर्यटन प्रवर्धन सरोकार समितिले जनाएको छ । 

१२ दिनसम्म चल्ने महोत्सवमा १५० व्यावसायिक स्टल रहने छन् । चार जिल्लाका कृषि उत्पादन, हस्तकलाका सामग्री प्रदर्शनीका साथै परम्परागत जातीय संस्कृति झल्कने प्रस्तुति रहने आयोजकले जनाएको छ । महोत्सवमा ५० हजारबढी पर्यटक इलाम पुग्ने अपेक्षा गरिएको छ । महोत्सव सञ्चालन गर्न ५० लाख रुपैयाँ खर्च हुने अनुमान गरिएको छ ।

महोत्सवको प्रवर्द्धकका रूपमा प्रदेश सरकार उद्योग, पर्यटन, वन तथा वातावरण मन्त्रालय, नेपाल पर्यटन बोर्ड र मेची पहाडी क्षेत्र पर्यटन प्रवर्द्धन विकास समिति छन् ।