गृहमन्त्रीको राजीनामा माग्दै रास्वपाको प्रदर्शन

काठमाडौं- बालकुमारी घटनाका विषयमा गृहमन्त्रीको राजीनामा माग गर्दै राष्ट्रिय स्वतन्त्र पार्टीले प्रदर्शन गरेको छ। ललितपुरको बालकुमारीस्थित ईपीएस कार्यालय अगाडि प्रदर्शन गर्दै रास्वपाले गृहमन्त्रीको राजीनामा माग गरेको हो।

प्रदर्शनमा सहभागी राष्ट्रिय स्वतन्त्र पार्टीकी नेतृ तथा सांसद तोसिमा कार्कीले हरेक नागरिकको बाच्न पाउने अधिकार हुँदाहुँदै पनि युवाले गरेको प्रदर्शनमा गोली चलाउनु दुखद् भएको बताइन्। घटनामा गृह मन्त्रालयले छानबिन गरेको अवस्थामा नैतिकतामा आधारमा गृहमन्त्रीले राजीनामा दिनुपर्ने उनको माग छ।

प्रदर्शनमा सहभागीहरुले प्रधानमन्त्रीज्यू, १७ हजार प्लस २ भयो त? अझै कति?’ नालायक सरकार राजीनामा दे, मृतकलाई सहिद घोषणा गर लगायतका प्लेकार्ड प्रदर्शन गरेका थिए।

शुक्रबार ललितपुरको बालकुमारीमा भएको विरोध प्रदर्शनका क्रममा प्रहरीले बल प्रयोग गर्दा दुई जनाको ज्यान गएको थियो। घटनालाई लिएर गृहमन्त्री नारायणकाजी श्रेष्ठको चर्को आलोचना भइरहेको छ।