बार्सिलोना भिल्लारियलको सामना गर्दै

एजेन्सी- स्पेनिस ला लिगा फुटबलमा आइतबार राति साबिकको विजेता बार्सिलोना भिल्लारियलसँग भिड्दै छ । बार्सिलोनाले आफ्नो घर क्याम्प नोउमा १४औं हप्ताको खेल भिल्लारियलसँग खेल्न लागेको हो । 

खेल नेपाली समय अनुसार आइतबार राति ११:१५ बजेबाट बार्सिलोनोका घरमा सुरु हुँदैछ । बार्सिलोनालाई अंक तालिकाको शीर्ष स्थानमा उक्लिन आइतबारको खेलमा जित निकाल्नै पर्ने बाध्यता हुनेछ । 

जहाँ बार्साले हाल लिगको १७औं स्थानमा रहेको भिल्लारियलविरुद्ध सहज जित निकाल्न प्रयास गर्नेछ । गत साता एथ्लेटिकोविरुद्धको खेल दौरान राफिन्हा, सर्जी रोवेर्टो, लुइस स्वारेज, सामुएल उम्टिटीलगायत खेलाडी घाइते भएका थिए । 

तर, आजको खेलमा बार्सिलोनाको टोलीमा केही प्रमुख खलाडी हुनेछैनन् । आजको खेलमा स्वारेज हुनेछैनन् । यद्यपि, बार्सिलोनालाई कप्तान लिओनल मेस्सी, फिलिपे कोउटिन्हो, इभान राकिटिकलगायत खेलाडीको साथ हुनेछ ।

बार्सिलोना हाल अंक तालिकामा १३ खेलपछि मात्रै २५ अंक जोडेर दोस्रो स्थानमा रहेको छ । जहाँ १३ खेलमा ७ खेलमा जित ४ खेल बराबरी र २ खेलमा हार व्यहोरेको छ ।