‘ए’ डिभिजन लिग : जावालाखेल युथको पहिलो जित

काठमाडौं- पल्सर सहिद स्मारक ‘ए’ डिभिजन लिग फुटबलमा जावला खेल युथ क्लबले पहिलो जित निकालेको छ । हल्चोकस्थित एपीएफ क्लबको खेल मैदानमा आइतबार भएको खेलमा ब्रिगेड ब्वाईज क्लब १-० ले गोल परासजत गर्दै जावालाखेलले लिगमा पहिलो जित निकालेको हो ।

जावलाखेल युथ क्लबको जितका लागि अरुज सिंहले गोल गरेका थिए । उनले ८८ औं मिनेटमा पाएको पेनाल्टीलाई गोलमा परिणत गरेका हुन् । पहिलो हाफ गोल रहित बराबरीमा सकिएको खेलमा जावलाखेललाई गोल गर्न निकै समय कुर्नु पर्यो । 

यसअघिका ४ खेल खेल्दा जावलाखेलले एक खेल बराबरी र ३ खेलमा हार व्यहोरेको थियो । लिगको पहिलो खेल नेपाल पुलिस क्लबसँग १-० ले पराजित भएको जवला खेल दोस्रो खेलमा संकटासँग २-० ले पराजित भएको थियो । 

त्यस्तै तेस्रो खेलमा हिमालयन सेर्पासँग २-१ ले पराजित हुँदा आफ्नो चौथो खेलमा फ्रेन्डस् क्लबसँग ३-३ को बराबरी खेलेको थियो । यता ब्रिगेड ब्वाईजले पनि लिगका ५ खेल खेल्दा १ खेलमा जित र ४ खेल गुमाएको छ ।