सिटीको अपराजित यात्रा कायमै, बर्नमाउथलाई ३-१ ले पराजित

एजेन्सी- इंग्लिस प्रिमियर लिगमा म्यानचेस्टर सिटीले आफ्नो अपराजित यात्रा कायम राखेको छ । शनिबार राति भएको खेलमा सिटीले बर्नमाउथलाई ३-१ ले पराजित गर्दै आफ्नो अपराजित यात्रा कायमै राखको हो । 

सिटीको जितका लागि बर्नार्डो सिल्भा, रहिम स्टरलिङ र इल्काए गुन्डोगनले एक एक गोल गरे । सिटीले बर्नार्डो सिल्भाको गोल मार्फत खेलमा अग्रता लिएको थियो । उनले खेलको १६ औं मिनेटमा गोल गरेका थिए । 

तर, बर्नमाउथका लागि पहिलो हाफको अन्तिम मिनेटमा क्यलम विल्सनले गोल गोल गर्दै खेल बराबरीमा ल्याए । साइमन फ्रान्सिसको क्रसमा क्यलम विल्सनले ४४ औं मिनेटमा गोल गरेका थिए । 

दोस्रो हाफमा आक्रमक देखिएको सिटीले थप दुई गोल गर्यो । रहिम स्टरलिङले ५७ औं मिनेटमा गोल गर्दै सिटीको अग्रता २-१ परे । त्यसपछि खेलको ७९ औं मिनेटमा गुन्डोगनले गोल गर्दै सिटीको जित पक्का गरे । 

यस जितसँगै सिटीको १४ खेलमा १२ जित र २ बराबरसँगै ३८ अंक भएको छ । दोस्रो स्थानको लिभरपुलले १३ खेल खेल्दै ३३ अंक जोडेको छ । लिग अन्तर्गत नै शनिबार अन्य खेलमा वेस्ट ह्याम युनाइटेडले न्यूक्यासल युनाइटेडलाई ३-० ले पराजित गर्दा क्रिस्टल प्यालेसले बर्नलीलाई २-०, कार्डिफ सिटीले वल्भरह्याम्प्टन वन्डरर्सलाई २-१,  ब्राइटन एन्ड होभ आल्बियनले हडर्सफिल्ड टाउनलाई २-१ तथा लेस्टर सिटीले वाटफोर्डलाई २-० ले पराजित गरे ।