उत्तर प्रदेशका मुख्यमन्त्री योगीको भ्रमण अनौपचारिक?

जनकपुरधाम-रामजानकी विवाहोत्सको अवसर पारेर भारत उत्तर प्रदेशका मुख्यमन्त्री योगी आदित्यनाथ २६ मंसिरका दिन जनकपुर पुग्दैछन् । हिन्दु धर्मका प्रचारकका रुपमा समेत परिचित आदित्यनाथ जनकपुुर आउने भएपछि स्वागत गर्न प्रदेश सरकार व्यस्त देखिएको छ । 

आदित्यनाथको जनकपुर भ्रमणलाई दृष्टिगत गरी पटकपटक उच्च सुरक्षा अधिकारीहरुको बैठकसमेत बस्दै आएको छ । भारतीय दूतवासको टोली बेलाबेला जनकपुर पुगेर प्रदेश सरकारका मन्त्री र जानकी मन्दिरका महन्तसँग समेत योगीको जनकपुर भ्रमणबारे छलफल गरेको छ ।

तर, उत्तर प्रदेशका मुख्यमन्त्री आदित्यनाथ जनकपुर आउनेबारे प्रदेश २ को सरकारलाई अझै औपचारिक जानकारी आइसकेको छैन् । २६ मंसिर आउन अब केहिदिन मात्र बाँकी रहेको अवस्थामा प्रदेश सरकारले औपचारिक जानकारी नपाएपछि उनको जनकपुर भ्रमण अनौपचारिक त होइन भनेर आंकलनसमेत गर्न थालिएको छ ।

रामजानकी विवाहोत्सवको अवसरमा हरेक पाँच वर्षपछि भारतको अयोध्याबाट जन्ती आउने परम्परा रहेको छ । र, विवाहोत्सवमा जन्तीको रुपमा सहभागी आउन जानकी मन्दिरले अयोध्यामा औपचारिक निमन्त्रणा दिने गरेको छ । तर, यसअघि अयोध्याबाट जन्ती आएको पाँच वर्ष नपुगेकोले जानकी मन्दिरले पनि निमन्त्रणा पठाएको छैन् ।

यसैगरी प्रदेश सरकार र स्थानीय सरकारले समेत मुख्यमन्त्री आदित्यनाथलाई जनकपुर आउन आमन्त्रण गरेका छैनन् । संघीय सरकारले पनि उनको जनकपुर भ्रमणबारे केहि बोलेको छैन् ।

तर पनि आदित्यनाथ रामजानकी विवाहोत्सवको अवसरमा जनकपुर आउँदैछन् । केहि दिनअघिमात्र नेपालका लागि भारतीय राजदूत मञ्जीवसिंह पुरीले उत्तर प्रदेशका मुख्यमन्त्री आदित्यनाथ विवापञ्चमीको अवसरमा जनकपुर आउन लागेको जानकी मन्दिरलाई जानकारी गराएका थिए । उनको जनकपुर भ्रमणबारे हालसम्मको औपचारिक जानकारी यतिमात्र हो ।

प्रदेश २ का मुख्यमन्त्री लालबाबु राउतले पनि आदित्यनाथको जनकपुर भ्रमणसम्बन्धमा औपचारिक जानकारी आएको बारे स्पष्ट पारेका छैनन् । भारतीय टोलीहरु यहाँ पुगेर पटकपटक छलफल गर्ने गरेको र सुरक्षा बैठक भइरहेकोले मुख्यमन्त्री आदित्यनाथ जनकपुर आउने संभावना रहेको उनको भनाइ छ ।

प्रदेश २ का आन्तरिक मामिला तथा कानुनमन्त्री ज्ञानेन्द्र यादवले भने विदेशी पाहुना संघीय सरकारलाई जानकारी नदिइ आउन नसक्ने तर्क गरे । मुख्यमन्त्री आदित्यनाथको जनकपुर भ्रमणका लागि आफूहरुको तर्फबाट निमन्त्रणा नदिइएको बताउँदै यादवले संघीय सरकारको परराष्ट्र मन्त्रालयलाई धेरै जानकारी हुनुपर्ने उल्लेख गरे ।

आदित्यनाथको जनकपुर भ्रमणबारे औपचारिक जानकारी नआएपनि उनको स्वागतका लागि प्रदेश सरकार तम्तयार देखिन्छ । जनकपुर झरेपछि विमानस्थलमा प्रदेश सरकारकै कुनै प्रतिनिधिले आदित्यनाथलाई स्वागत गर्ने प्रदेश २ का कानुनमन्त्री यादव बताउँछन् । मन्त्री यादवले पनि उनको जनकपुर भ्रमणबारे औपचारिक जानकारी नआएपनि आफूहरु तयारीलाई तिव्रता दिएको बताए । आदित्यनाथको जनकपुर भ्रमणलाई दृष्टिगत गरी चारै तहको झण्डै तीन हजार सुरक्षाकर्मी परिचालन गर्ने तयारी रहेको कानुनमन्त्री यादवले जानकारी दिए ।

विवहोत्सवमा सरिक हुन आउन लागेको आदित्यनाथको जनकपुर भ्रमण विशुद्ध रुपले धार्मिकमात्र रहेको बताइएको छ । संघीय र प्रदेश सरकारको निमन्त्रणा बिनै आउने भएकाले उनी दर्शनार्थीको रुपमा मात्र जनकपुर आउन लागेको तर्कसमेत गर्न थालिएको छ ।

मुख्यमन्त्री आदित्यनाथको निजी विमान बिहान १० बजे जनकपुर विमानस्थलमा अवतरण गर्ने कार्यक्रम छ । विमानस्थल झरेपछि आदित्यनाथ सोझै जानकी मन्दिर पुगेर पूजाअर्चना गर्नेछन् । जानकी मन्दिरबाट ‘मधेश भवन’ पुगेर प्रदेश सरकारले उनको सम्मानमा आयोजना गरेको दिवा भोजमा आदित्यनाथ सहभागी हुने छन् । ‘मधेश भवन’ प्रदेश सरकारका मन्त्री तथा सांसदहरुसँग भेटघाट गरी करिब एक घण्टापछि उनी रंगभूमि मैदान पुगेर रामजानकी विवाहोत्सव अन्तर्गत स्वयंभर कार्यक्रममा सहभागी हुने छन् । स्वयंभर कार्यक्रम सम्पन्न भए लगत्तै आदित्यनाथको त्यहि दिन भारत फर्कने कार्यक्रम तय भएको छ ।