‘ए’ डिभिजन लिग : मनाङको लगातार पाँचौ जित 

काठमाडौं- पल्सर सहिद स्मारक ‘ए’ डिभिजन लिग अन्तर्गत मनाङ मस्र्यादी क्लबले लगातार पाँचौ जित दर्ता गरेको छ । शनिबार हल्चोकस्थित एपीएफको खेल मैदानमा भएको खेलमा सरस्वती फुटबल क्लबलाई २-० गोल अन्तरले पराजित गर्दै लिगमा अपराजित यात्रा कायम राखेको हो । 

पहिलो हाफ गोल रहित बराबरी भएको खेलको दुबै गोल दोस्रो हाफमा सम्भव भएको थियो । मनाङको जितका लागि मिडफिल्डर अन्जन विष्ट र ओलावले आफिजले एक एक गोल गरेका थिए । यस जितसँगै मनाङले शिर्षस्थानमा ३ अंकको अग्रता बनाएको छ । 

खेलको ५५ औं मिनेटमा अन्जनको उत्कृष्ट गोल मार्फत मनाङले अग्रता लिएको थियो । विमल रानामगरको नियन्त्रण बाहिरको बललाई सहि सदुपयोग गर्दै अन्जनले गोल गरेका थिए । 

त्यस्तै ओलावाले आफिजले ७८ औं मिनेटमा मनाङको अग्रता दोब्बर पारे । आफिजले विमल रानामगरको लामो पासलाई उत्कृष्ट गोलमा परिणत गरे । मनाङको ५ खेलमा १५ अंक जोडेको छ । मनाङलाई रुस्लान थ्री स्टार र संकटाले १२ अंक जोड्दै पछ्याइरहेका छन् ।