‘मिथिला पेन्टिङ’ ले सजाइँदै जनकपुर रेलवे स्टेशन

जनकपुरधाम–पुरानो रेलमार्गलाई विस्थापित गरी तयार पारिएको जनकपुर–जयनगर ब्रोडगेज रेलखण्डको निर्माण करिब करिब सम्पन्न भइसकेको छ । भारत सरकारको आर्थिक सहयोगमा निर्माण गरिएको जनकपुर–जयनगर रेल यहि डिसेम्बर महिनाभित्र सञ्चालन गर्ने लक्ष्य लिइएको छ ।

रेल गुडाउ अन्तिम चरणको काम चलिरहेको बेला जनकपुर रेलवे स्टेशनलाई मिथिला पेन्टिङले सजाउन व्यस्त छिन्, लक्ष्मीदेवी राय अहिले । रेलबाट यात्री झर्ने बित्तिकै जनकपुरलाई पौराणिक मिथिलाको झझल्को भेटोस भन्दै लक्ष्मी दिनरात लगाएर रेलवे स्टेशनको भित्ताहरुमा मिथिला चित्रकला कोरी रहेकी छिन् ।

भारत विहारको मधुबनी घर भएकी ४२ वर्षीया लक्ष्मीलाई जनकपुर रेलवे स्टेशनका भित्ताहरुमा मिथिला पेन्टिङ कोरेर सजाउने जिम्मा भारतीय अधिकारीहरुले नै दिएका छन् ।

भवनसहित अन्य निर्माण कार्य भारतले गर्नु पर्ने सम्झौता रहेकोले जनकपुर रेलवे स्टेशनको भित्ताहरुमा ‘मिथिला पेन्टिङ’ कोर्ने जिम्मा भारत मधुबनी बस्ने लक्ष्मीलाई दिइएको हुन सक्छ । जनकपुर नजिकै रहेको भारतको मधुबनी रेलवे स्टेशनलाई पनि मिथिला चित्रकलाले यसैगरी सजाइएको छ ।

भारतले निर्माण गरेको र लक्ष्मी पनि भारतीय रहेकै कारण जनकपुर रेलवे स्टेशनमा मिथिला चित्रकला कोर्ने जिम्मा पक्कै पाएकी होइनन् । 

‘मिथिला पेन्टिङ’ को क्षेत्रमा ठुलै ख्याती कमाउन सफल भएकी छिन, उनी । ‘मिथिला पेन्टिङ’ प्रतिको लगन, मिहिनेत र संघर्षले १५ वर्ष अगाडी पटना रेलवे स्टेशनमा पहिलो पटक मिथिला चित्रकला कार्ने अवसर जुड्यो, लक्ष्मीलाई । पटना रेलवे स्टेशनमा पहिलो पटक कोरेको उनको कलाले चर्चा पाएपछि ‘मिथिला पेन्टिङ’ लाई पेशा बनाउन लक्ष्मीलाई हौस्यायो । र, अहिले यस क्षेत्रका चर्चित नाम बनेकी छिन, लक्ष्मी ।

कडा संघर्ष र मिहिनेतपछि लक्ष्मीको मिथिला चित्रकलाले चारैतर्फ चर्चा पाएपछि भारत सरकारले उनलाई राज्य पुरस्कारबाट सम्मानितसमेत गर्‍यो । भारत सरकारको तर्फबाट पुरस्कृत भइसकेपछि ‘मिथिला पेन्टिङ’ प्रति थप झुकाव बढ्यो, उनको ।

मधुबनी र पटनाको रेलवे स्टेशन झैँ जनकपुरको रेलवे स्टेशन पनि मिथिला चित्रकलाले सजाउने रहर छ, लक्ष्मीको । र, यही रहरका साथ उनी तल्लिन छिन, रेलवे स्टेशनको भित्ताहरुमा मिथिला चित्रकला कोर्न । आफूले कोरेको चित्र हेर्नासाथ मिथिला आइ पुगेको अनुभूति यात्रीलाई होस उनको चाहना छ ।

जनकपुरमै पनि ‘मिथिला पेन्टिङ’का जानकारहरु रहेपनि रेलवेका निर्माणतर्फका सम्पूर्ण काम भारतको जिम्मामा रहेकोले लक्ष्मीलाई जिम्मा दिएको हुन सक्ने रेलवेका साइट इन्जिनियर विनोद ओझा बताउँछन्।