किरण माल्दिभ्सको धिवेही प्रिमियर लिगको सर्वोकृष्ट गोलकिपर

काठमाडौं- नेपाली राष्ट्रिय टिमका गोलरक्षक किरण चेम्जोङ माल्दिभ्सको शीर्ष डिभिजन लिग धिवेही प्रिमियर लिग फुटबलमा लिगका सर्वोकृष्ट गोलकिपर चुनिएका छन् । किरणको उच्च प्रर्दशन कै कारण टिसी स्पोर्ट्सले पहिलो पटक धिवेही प्रिमियर लिग फुटबलको उपाधि उचालेको हो ।  

शुक्रबार भएको खेलमा न्यु रेडियन्ट र ग्रिन ब्वाईजले ४-४ गोलको बराबरी खेलेसँगै एक खेल अगावै टिसी स्पोर्टसले लिग उपाधि जितेको हो । लिग चरणको अन्तिम खेलमा टिसी स्पोर्टसले क्लब ईगलसँग ४-४ गोलको बराबरी खेलेको थियो ।

 किरणको टोलीले लिगको १६ खेलमा १३ जित, १ बराबर र २ हारसहित ४० अंक जोड्दै लिग उपाधिमाथि कब्जा जमाएको हो । अन्तिम चरणको खेलसम्म पनि दोस्रो स्थानको माजियाले टिसीलाई चुनौती दिएको थियो । 

अन्तिम चरणको खेलमा माजिया र न्यु रेडीयन्टले ४-४ को बराबरी खेलेपछि टिसी आफ्नो अन्तिम खेल अगाडी नै विजेता हुने पक्का भएको थियो । माजियाले १६ खेलमा ३८ अंक जोड्दा टिसीले ४० अंक जोड्दै उपाधि जित्यो ।

किरणले गतवर्ष मिन्नरेभा पन्जाबबाट खेल्दै भारतको आई लिग उपाधि पनि जितेका थिए । नेपालमा हुँदा रुस्लान थ्री स्टारबाट राष्ट्रिय लिग जितेपछि विदेश लागेका किरणले टिसी स्पोर्ट्सबाटै दुई वर्षअघि बंगलादेशमा सम्पन्न शेख कमल अन्तर्राष्ट्रिय फुटबल प्रतियोगिताको उपाधि पनि जितेका थिए । 

किरणले राष्ट्रिय टोलीलाई एएफसी सोलिडारिटी कप जिताउन पनि महत्त्वपूर्ण भूमिका निर्वाह गरेका थिए ।