लुम्बिनी प्रदेशसभाको विशेष अधिवेशन अन्त्य

बुटवल– लुम्बिनी प्रदेशसभाको विशेष अधिवेशन शुक्रबार मध्यरातदेखि अन्त्य भएको छ। 

लुम्बिनी प्रदेशसभाका सचिव दुर्लभकुमार पुन मगरले शुक्रबार सूचना जारी गर्दै बिशेष अधिवेशन अन्त्य भएको जनाएका हुन्। प्रदेश प्रमुख अमिक शेरचनद्वारा जारी गरिएको बिशेष अधिवेशन मध्यान्ह १२ बजेबाट अन्त्य भएको प्रदेशसभा सदस्यहरुलाई सचिव पुनले जानकारी गराए। 

मुख्यमन्त्री शंकर पोखरेल विरुद्ध अविश्वासको प्रस्ताव दर्ता गरी गत साउन १९ गते चार दलका  ३४ जना सांसदहरुले प्रदेश प्रमुख समक्ष बिशेष अधिवेशन माग गरेका थिए। चार दलीय गठबन्धनको माग अनुसार प्रदेश प्रमुख शेरचनले साउन २७ गते प्रदेशसभाको विशेष अधिवेशन आह्वान गरेका थिए। 

निवर्तमान पोखरेलले भने बिशेष अधिवेशन छलेर पदबाट राजीनामा दिएका थिए। चार दलको गठबन्धनबाट कुलप्रसाद केसी मुख्यमन्त्रीमा नियुक्त भएका छन्।