चीन भ्रमणमा निस्किए प्रधानसेनापति शर्मा 

काठमाडौं– प्रधानसेनापति प्रभुराम शर्मा चीनको औपचारिक भ्रमणका लागि बेइजिङ उडेका छन्। उनलाई त्रिभुवन अन्तर्राष्ट्रिय विमानस्थलमा रक्षा सचिव किरणराज शर्मा र बलाध्यक्ष रथी सीताराम खड्काले बिदाइ गरे।

भ्रमणका क्रममा प्रधानसेनापति शर्मा बेइजिङमा आयोजना हुने बेइजिङ झिङसान फोरम उद्घाटन समारोहमा सहभागी हुनेछन्। शर्मा र चिनियाँ जनमुक्ति सेना सीएमसीका चिफ अफ स्टाफ जनरल लिउ झेनलीबीच भेटवार्ता हुने कार्यक्रम रहेको सैनिक जनसम्पर्क तथा सूचना निर्देशनालयले जनाएको छ। 

भ्रमणका क्रममा उनले सियान सिटी, सांघाई र ग्वाङ्झाउमा अवस्थित चिनियाँ जनमुक्ति सेनाका विभिन्न इकाइ तथा शिक्षण संस्थाको भ्रमण गर्नेछन्। शर्मा १६ कात्तिकमा देश फर्कनेछन्।

भ्रमण दलमा मध्यपूर्वी पृतनापति उपरथी प्रेमध्वज अधिकारी र प्रधानसेनापतिको सैनिक सहायक तथा स्टाफ अधिकृत रहेका छन्। प्रधानसेनापतिको अनुपस्थितिमा बलाध्यक्ष रथी सीताराम खड्काले कामु प्रधानसेनापति भई कार्यभार सम्हाल्ने निर्देशनालयले जनाएको छ।