अमेरिकी राष्ट्रपति जो बाइडेनसँग प्रधानमन्त्री प्रचण्डको भेट

काठमाडौं– संयुक्त राष्ट्रसंघको महासभामा भाग लिन अमेरिकाको न्युयोर्कमा रहेका प्रधानमन्त्री पुष्पकमल दाहाल प्रचण्ड र अमेरिकी राष्ट्रपति जो बाइडेनबीच भेटवार्ता भएको छ।

महासभामा सहभागी हुन अमेरिका पुगेका विभिन्न देशका प्रतिनिधिको सम्मानमा राष्ट्रपतिले दिएको रात्रिभोजका क्रममा प्रधानमन्त्रीले बाइडेनसँग फोटो सेसन र संक्षिप्त भेट गरेको प्रचण्डको सचिवालयले बताएको छ।

दुई नेताबीच भेटएको तस्बिर प्रधानमन्त्री प्रचण्डको सचिवालयले सार्वजनिक गरेको छ। भेटपछि प्रधानमन्त्री प्रचण्डले न्यानो आतिथ्यका लागि बाइडेन दम्पतीलाई आभार तथा धन्यवाद दिएका छन्।