गगन थापाले भने - प्रधानमन्त्रीलाई पद खुस्किने तनाव, मलाई ०८४ को चुनाव जित्‍ने तनाव 

काठमाडौं- नेपाली कांग्रेसका महामन्त्री गगनकुमार थापाले आफूलाई २०८४ को चुनाव कसरी जित्‍ने भन्‍ने तनाव रहेको बताएका छन्। काठमाडौंमा आयोजित एक कार्यक्रमलाई सम्बोधन गर्दै महामन्त्री थापाले हरेक मानिसहरु अहिले तनावमा रहेको बताएका छन्। 

उनले अहिलेका प्रधानमन्त्रीलाई पद कतिखेर खुस्किन्छ भन्‍ने चिन्ता रहेको पनि बताएका छन्। उनले भने, 'म अहिले चुनाव जितेर सांसद छु, मलाई अब ४ वर्षपछि कसरी चुनाव जित्ने भन्ने तनाव छ। ५ पटक प्रधानमन्त्री भएको मान्छेलाई ६ पटक किन भएन भन्ने तनाव छ। अहिले भएको प्रधानमन्त्रीलाई भरे बेलुका प्रधानमन्त्री खुस्केला की भन्‍ने तनाव छ।'

जिन्दगीको सबैभन्दा ठूलो कुरा भनेको खुशी कसरी हुने भन्ने रहेको बताउँदै उनले मानिस जहिल्यै पनि तनावमा रहने गरेको भन्दै सानो तिनो हारलाई पनि सहजै लिन जान्‍नुपर्नेसमेत उनले बताएका छन्।

‘जिन्दगीको सबैभन्दा ठूलो कुरा भनेको खुसी कसरी हुने भन्ने हो। तपाईंहरूले सफलताको भोक पनि राख्नुस्। परीक्षा छ भनेर घरबाट निस्किने बेलामा विद्यार्थीहरु तनावमा रहने गर्दछन्। सबै मान्छे जीवनमा बिहानदेखि बेलुकासम्म तनावमा बाच्ने रहेछन्। सानो तिनो हारलाई पनि सहजै लिन जान्नुपर्छ। काम गर्ने हो तर फलको आश नगर्ने हो। कर्म इमान्दारिताका साथ गर्नुपर्छ,’ उनले भने।