गुल्मीदरबारमा अविवाहित महिला–पुरुष दुवैलाई भत्ता

काठमाडौं– गुल्मीको गुल्मीदरबार गाउँपालिकाले अविवाहित महिला र पुरुष दुवैलाई भत्ता दिने निर्णय गरेको छ। पालिकाले ४० वर्ष कटेका महिला र ४५ वर्ष पूरा भएका अविवाहित पुरुषलाई सामाजिक सुरक्षा कार्यक्रमबाट भत्ता दिने भएको हो। 

गाउँपालिकाको वार्षिक नीति तथा कार्यक्रमबाट स्वीकृत कार्यक्रमअन्तर्गत साउनदेखि भत्ता दिइनेछ।

अविवाहित पुरुष र महिला दुवैको एक्लोपन महसुस नहोस् भन्ने उद्देश्यले प्रतिमहिना १ हजारका दरले भत्ता दिने निर्णय भएको पालिका अध्यक्ष सरोजकुमार थापाले बताए। बिहे नभएका महिला–पुरुषको साथमा पालिका रहेको अनुभूति दिलाउन भत्ता बाँड्न लागिएको उनको भनाइ छ।