एमाले सचिवालय बैठकको मिति सारियो

काठमाडौं–एमालेको आजदेखि सिरहामा तय गरिएको सचिवालय बैठक १३ भदौसम्मलाई सरेको छ।

धनगढीमाई नगरपालिका सर्रे अम्बासमा बस्ने भनेको बैठक निरन्तरको वर्षाका कारण सार्नुपरेको एमाले जिल्ला अध्यक्ष चण्डेश्वर मण्डलले जानकारी दिए। 

उक्त बैठकका लागि अध्यक्ष केपी ओली आजै विराटनगर गइसकेका छन्। ‘बैठक स्थलसम्म पुग्नलाई बीचमा खोला पर्ने भएकाले समस्या भयो। ‘निरन्तर वर्षाले खोलाबाढीको स्थिति छ। पार्टी अध्यक्षसँगको छलफलपछि बैठक सार्ने निर्णय भयो’, मण्डलले भने। 

एमालेले आजदेखि १२ भदौसम्म सर्रे अम्बासमा सचिवालय बैठक गर्ने तय गरेको थियो। सोही ठाउँमा एमालेले २०४६ मा एउटा काठघरमा चौथो महाधिवेशन गरेको थियो। उक्त महाधिवेशनले मदन भण्डारीलाई महासचिव चुनेको थियो।