सिद्धबाबा सुरुङ मार्ग निर्माणमा नयाँ परामर्शदाता छनोट

काठमाडौं– सिद्धार्थ राजमार्गको बुटवल–पाल्पा सडक खण्डमा बन्न लागेको सिद्धबाबा सुरुङ मार्ग निर्माणमा नयाँ परामर्शदाता छनोट भएको छ। परामर्शदाता ईआरएमसी–योङमा डोङसुङ जेभीलाई जिम्मेवारी दिइएको हो।

सडक विभागअन्तर्गतको गुणस्तर, अनुसन्धान तथा विकास केन्द्रले नयाँ परामर्शदाताको रुपमा ईआरएमसी–योङमा डोङसुङ जेभीलाई छानेको हो। केन्द्रका इन्जिनियर दीप वाराहीका अनुसार परामर्शदाताले ४० करोड ९१ लाख रुपैयाँ पाउनेछ।

स्वीस कम्पनीको डीपीआर अनुसार सुरुङ मार्ग बनाउन ग्लोबल टेन्डर गरेर यसअघि नै चाइना स्टेट कन्स्ट्रक्सन इन्जिनियरिङ कर्पोरेसनलाई छानिएको थियो। १.१२६ किलोमिटर लम्बाइको सुरुङ मार्ग ७ अर्ब ३४ करोड २१ लाख  लागतमा निर्माण गर्ने सम्झौता २०७८ फागुनमा भएको हो।

ठेकेदार कम्पनीले बर्खामास सकिएपछि सुरुङ खन्ने बताएको छ। उसले अहिले पूर्वतयारीका काम गरिरहेको छ। पूर्वतयारीस्वरुप रामापिथेकस पार्कनजिक डाइभर्सन निर्माण काम भइरहेको छ । ठेकेदार कम्पनीले सडक स्तरोन्नतिको काम गरिरहेको छ।