संसद्‍ बैठकमा टोपबहादुर निलम्बनको जानकारी गराउने कार्यसूची

काठमाडौं- प्रतिनिधि सभाको बैठक आज बस्दैछ। दिउँसो एक बजे बस्ने बैठकमा सभामुख देवराज घिमिरेले नेकपा एमालेका सांसद टोपबहादुर रायमाझी निलम्बनमा परेको जानकारी गराउने सम्भावित कार्यसूची छ।

रायमाझी नक्कली भुटानी शरणार्थी प्रकरणमा मुछिएपछि पुर्पक्षका लागि कारागारमा छन्। नेपाली नागरिकलाई भुटानी शरणार्थी बनाएर अमेरिका पठाउने ठगी धन्दामा मुछिएपछि जिल्ला प्रहरी परिसर काठमाडौंको टोलीले गत वैशाख ३१ गते बुढानीलकण्ठ–४ बाट रायमाझीलाई पक्राउ गरेको थियो।

रायमाझीले ठगी गर्ने गिरोहलाई सहज हुने गरी नीतिगत निर्णय गराउन भूमिका खेलेको आरोप छ। उनीविरुद्ध जिल्ला अदालत काठमाडौंले २० वैशाखमा पक्राउ पुर्जी जारी गरेको थियो। त्यसदिन अर्घाखाँचीमा रहेका उनी पक्राउ पुर्जी जारी भएपछि फरार थिए।

संसद् बैठकमा रायमाझी निलम्बनको सूचना सुनाउने कार्यसूची भए पनि रायमाझीकै पार्टी नेकपा एमालेले बैठक चल्न दिने छाँट छैन। सुन तस्करी प्रकरणलाई लिएर प्रमुख प्रतिपक्षी एमालेले साउन १० गतेदेखि संसद् बैठक सञ्चालनमा अवरोध गर्दै आएको छ। सभामुखको पहलमा गृहमन्त्रीले जवाफ दिएर संसद् खुलाउने सहमति भए पनि जवाफ चित्त नबुझाएर एमालेले अवरोध कायमै राखेको छ।

हिजोको बैठकमा गृहमन्त्री नारायणकाजी श्रेष्ठले सय किलो सुन तस्करी प्रकरणबारे लामो जवाफ दिएका थिए। लगत्तै एमालेका सचेतक महेश बर्तौलाले पार्टीको मागअनुसार संसदीय छानबिन गठन गर्ने प्रतिबद्धता नआएको भन्दै संसद् चल्न नसक्ने बताए। सभामुखले नियमित कारबाही अगाडि बढाउने प्रयास गरे पनि एमालेका सांसदहरु नाराबाजीमा उत्रिएपछि बैठक स्थगित गरे। बैठक आज दिउँसो १ बजेका लागि बोलाइएको छ।