नेपालले पाकिस्तानलाई दियो १८० रनको लक्ष्य

काठमाडौं– श्रीलंकाको कोलम्बोमा जारी एसीसी टिम्स एसिया कपको पहिलो खेलमा नेपालले पाकिस्तान ‘ए’ लाई १८० रनको लक्ष्य दिएको छ।

सुरुआती कमजोर खेलेको नेपालले अन्तिममा सम्हालिएर ३७ ओभरमा सम्पूर्ण विकेट गुमाई १७९ रन बनाएको हो। सोमपाल कामीले अर्धसतक बनाएपछि नेपालले १ सयभन्दा धेरैको लक्ष्य दिन सक्यो। सोमपालले ९ चौका र २ छक्काको सहयोगमा सर्वाधिक ७५ रन बनाए।

नेपालले सुरुआती ५ ओभरमै ३ विकेट गुमाएको थियो। त्यसको केही समयमै थप दुई विकेट गुमाएको थियो। १० ओभर सकिँदा नेपालले ६ विकेट गुमाइसकेको थियो। 
कोलम्बो क्रिकेट ग्राउन्डमा जारी खेलमा नेपालले टस जितेर पहिले ब्याटिङ रोजेको थियो। 

नेपालविरुद्ध पाकिस्तानका धनानीले ५ विकेट लिए भने वासिमले ४ विकेट गिराएका थिए। नेपालसँग खेल्ने पाकिस्तान ‘ए’ मा सिनियर टोलीबाट खेलेका ८ युवा र स्टार खेलाडी छन्। पाकिस्तान साविक विजेता टिम पनि हो।