पोखरामा विश्व संगीत दिवस मनाइँदै

पोखरा– पोखरामा आगामी ६ असारमा विश्व संगीत दिवस २०८० मनाइने भएको छ। सप्तरंगी सांस्कृतिक प्रतिष्ठानको मुख्य आयोजनामा यहाँका १८ संस्थाले विश्व संगीत दिवस मनाउन लागेका हुन्।

सोमबार आयोजित पत्रकार सम्मेलनमा उक्त संस्थाका अध्यक्ष नवराज बरालले पाँच वर्षदेखि रोकिएको विश्व संगीत दिवसलाई निरन्तरता दिन सांगीतिक कार्यक्रम गर्न लागिएको जानकारी दिए।

पोखरा उद्योग वाणिज्य संघको हलमा आयोजना हुने सो सांगीतिक कार्यक्रमले पोखराको सांगीतिक गतिविधि बढ्ने विश्वास आयोजक संस्थाले गरेको छ। सांगीतिक कार्यक्रममा राष्ट्रिय तथा अन्तर्राष्ट्रिय कलाकारले आफ्नो प्रस्तुति गर्ने जानकारी सो अवसरमा दिइएको थियो।

१६ विभिन्न प्रस्तुति रहने उक्त सांगीतिक कार्यक्रमा दर्शकले निःशुल्क प्रवेश पाउने बताइएको छ। गण्डकी प्रज्ञा प्रतिष्ठान तथा पोखरा प्रज्ञा प्रतिष्ठानको सहकार्यमा गर्न लागिएको उक्त कार्यक्रम आगामी वर्ष संयुक्त रूपमा मनाइने जानकारी सो अवसरमा दिइएको थियो।