पोखरामा चिनाइँदै जनकपुरको मिथिला संस्कृति

गण्डकी–आभ्या क्लबको आयोजनामा ९ र १० मंसिरमा पोखरामा जनकपुरको मिथिला संस्कृति, कला एवं पोखरेली ह्यान्डीक्राफ्ट प्रदर्शनी हुने भएको छ।
जनकपुरको धार्मिक, ऐतिहासिक, पौराणिक मिथिला संस्कृतिलाई पोखरेलीसामु ल्याउन प्रदर्शनी गर्न लागिएको पत्रकार सम्मेलनमा कार्यक्रम संयोजक कृपा श्रेष्ठले जानकारी दिएकी हुन्।

‘मिथिला शैली, कला र सांस्कृतिक समृद्धि’ नाराका साथ गर्न लागिएको प्रदर्शनीमा जनकपुरका आठ कलाकारसहित १५ जनाको टोली पोखरा आउनेछन्।

उक्त क्रममा आभ्या क्लब परिसरमा नै पोखरेली महिलाको हस्तकला प्रदर्शन गरिने उल्लेख गर्दै उनले मिथिला र पोखरेली कलाकारको सहभागितामा चित्रकला कार्यशाला पनि गरिने बताइन्।

कला–संस्कृतिको संरक्षणका लागि यसअघि साउनको दोस्रो साता ‘अ डे विद कलर्स’ शीर्षकमा पोखराका बालबालिका तथा विभिन्न उमेर समूहका झण्डै दुुई सय ५० जनाको सहभागितामा सम्पन्न गरिएको क्लबले जनाएको छ। त्यस्तै, भदौ तेस्रोे साता माटो, कला र पोखरा शीर्षकमा मूर्तिकलासमेत सम्पन्न गरिएको श्रेष्ठले जानकारी दिइन्।–रासस