कोभिड खोप दैनिक दुई लाख डोज लगाउने सरकारको योजना

काठमाडौं– स्वास्थ्य तथा जनसंख्या राज्यमन्त्री उमेश श्रेष्ठले दैनिक दुई लाख जनालाई कोभिड खोप लगाउने योजनाका साथ काम भइरहेको बताएका छन्। 

प्रतिनिधिसभाको बुधबारको बैठकमा उनले सबै नेपाली नागरिकलाई खोप उपलब्ध गराउन साढे पाँच करोड डोज खोप आवश्यक पर्ने जानकारी दिए। ‘हामीलाई पाँच करोड ५० लाख खोप आवश्यक पर्ने देखिएको छ। पूर्ववर्ती सरकारले ९७ लाख सुनिश्चित गरेको थियो। त्यसमध्ये असार मसान्तसम्ममा ४२ लाख खोप लगाइएको थियो।’ उनले हिजो बुधबारसम्म देशभर ७५ लाखलाई खोप लगाइएको जानकारी दिए। 

उनले पछिल्लो एक हप्ताको तथ्यांक हेर्दा कोरोना संक्रमणको दर बढ्दै गएको भन्दै सबैले सचेत हुनुपर्ने बताए। अस्पतालको स्तर वृद्धि गरेर अघि बढ्ने सरकारले योजना बनाएको भन्दै उनले आगामी दिनमा निजी क्षेत्रसँगको साझेदारीमा खोप कार्यक्रम अघि बढाइने जानकारी दिए। खोपलाई नाफामूलक भन्दा सेवामूलक बनाउनेतर्फ ध्यान दिने उनको भनाइ थियो।