लुम्बिनीमा चार दलीय गठबन्धनद्वारा बहुमत सरकारका लागि दाबी पेस

बुटवल–लुम्बिनी प्रदेशमा माओवादी केन्द्र संसदीय दलका नेता कुलप्रसाद केसीले ४ दलीय गठबन्धनको समर्थनमा प्रदेश प्रमुखसामु मुख्यमन्त्रीको दाबी पेस गरेका छन्। संविधानको धारा १६८ को उपधारा २ बमोजिम दुई वा दुईभन्दा बढी दलको बहुमत पुर्‍याएर केसीले नयाँ सरकार गठनका लागि दाबी पेस गरेका हुन्। 

मुख्यमन्त्रीबाट शंकर पोखरेलले राजीनामा दिएपछि प्रदेश प्रमुख अमिक शेरचनले बुधबार २४ घण्टाको समय दिएर नयाँ सरकार गठनका लागि आह्वान गरेका थिए। सोहीअनुसार ४१ सांसद रहेको नेपाली कांग्रेस, माओवादी केन्द्र, जनता समाजवादी पार्टी र राष्ट्रिय जनमोर्चाको गठबन्धनले केसीको नेतृत्वमा नयाँ सरकारका लागि दाबी पेस गरेको हो।  कांग्रेस प्रमुख सचेतक फखरुद्दिन खानले गठबन्धनले ४१ सा्रसदको हस्ताक्षरसहित दाबी पेस गरेको जानकारी दिए। मुख्यमन्त्रीमा प्रस्तावित केसी रोल्पा १ (क) बाट निर्वाचित हुन्।

सत्ताबाट बाहिरिएको नेकपा एमालेले भने सरकारका लागि दाबी नगर्ने जनाएको छ। एमाले सांसद तथा पूर्वमन्त्री बैजनाथ चौधरीले आफूहरु प्रतिपक्षमा रहने जनाए। प्रदेश प्रमुखले केसीलाई मुख्यमन्त्री नियुक्त गर्ने र शपथ गराउने तयारी छ। 

गठबन्धनबीच मुख्यमन्त्रीमा आठ–आठ महिना आलोपालो गर्ने सहमति भए पनि अन्य मन्त्रालय बाँडफाँटको काम बाँकी नै छ। पहिलो ८ महिना केसी र २०७८ फागुन २ गतेपछि नेपाली कांग्रेस संसदीय दलका नेता वीरेन्द्रप्रसाद कनौडिया मुख्यमन्त्री बन्ने सहमति छ।