काठमाडौं उपत्यकामा आजदेखि बेलुकी ८ बजेपछि सवारीसाधन सञ्चालनमा रोक

काठमाडौं- काठमाडौं उपत्यकामा आज बेलुकी ८ बजेदेखि लागू हुने गरी सार्वजनिक तथा निजी सवारीसाधन सञ्चालनमा रोक लगाएको छ।

कोरोना महामारी संक्रमण बढ्न थालेपछि प्रशासनले सवारीसाधन आवतजावतमा कडाइ गर्न लागेको हो। काठमाडौंका प्रमुख जिल्ला अधिकारी कालीप्रसाद पराजुलीले जारी गरेको निषेध आदेशमा पछिल्लो समय कोभिड–१९ संक्रमण बढ्दै जाँदा काठमाडौँ उपत्यकामा रात्रिकालीन सवारीसाधनको आवतजावतमा कडाइ गरिएको उल्लेख छ। 

आदेशमा उल्लेख छ, 'अत्यावश्यकबाहेकका अन्य निजी एवम् सार्वजनिक सवारीसाधनहरु बेलुका ८ बजेभित्र आफ्नो गन्तव्यमा पुग्नुपर्नेछ।' स्थानीय ढुवानी बिहान ९ बजेदेखि ११ बजेसम्म र अपराह्न ४ बजेदेखि ७ बजेसम्म सञ्चालन गर्न पाइनेछ। आठ बजेभन्दा अगाडि भने सवारी सञ्चालनमा रोक लगाइएको छैन।

निषेध आदेशको समय आगामी भदौ ८ गतेसम्म थप गरिएको छ भने अन्य प्रावधानलाई नै निरन्तरता दिइएको छ। नेपालमा बुधबारसम्म सात लाख ९५ हजार ३९१ जनामा कोरोना संक्रमण भएको छ। तीमध्ये ६ लाख ७५ हजार ८३ जना संक्रमणमुक्त भएको स्वास्थ्य तथा जनसंख्या मन्त्रालयको विवरणमा उल्लेख छ। यसैगरी १० हजार १८० जनाको निधन भएको छ भने सक्रिय संक्रमितको संख्या ३८ हजार ३३ छ। तीमध्ये काठमाडौं उपत्यकामा मात्र सक्रिय संक्रमितको संख्या ११ हजारभन्दा बढी छ।