घट्टेखोलामा करेन्ट लगाएर माछा मार्दा अकाल मृत्यु

मुगु– खोलामा माछा मार्न करेन्ट लगाउँदा माछा मार्ने युवकलाई नै करेन्ट लागेर मृत्यु भएको छ।

मुगुको छायानाथ रारा नगरपालिका–१ र ४ मा पर्ने घट्टेखोलामा माछा मार्न करेन्ट लगाउने क्रममा करेन्ट लागेर सोही नगरपालिका–४ भामवाडाका २२ वर्षीय सञ्जय भामको शुक्रबार मृत्यु भएको हो।

ब्याट्री र १२ भोल्टको इन्भर्टर लगेर खोलामा माछा मार्न गएका भामलाई दिउँसो २ बजेतिर खोलामा करेन्ट लागेर बेहोस भएपछि साथीहरूले जिल्ला अस्पताल मुगु लगेका थिए।

अस्पतालमा पुगेपछि भामको ३ बजे मृत्यु भएको जिल्ला प्रहरी कार्यालयका प्रहरी नायब उपरीक्षक महेश बस्नेतले जानकारी दिए। शव परीक्षणका लागि जिल्ला अस्पताल मुगुमा राखिएको छ।

माछा मार्न प्रयोग गरिएका ब्याट्री र इन्भर्टर प्रहरीले नियन्त्रणमा लिइसकेको छ। मुगु कर्णाली नदी र यसका सहायक खोलामा माछा मार्न  पछिल्ला वर्षमा करेन्ट प्रयोग बढ्दै गएको छ।