परराष्ट्रमन्त्री को हो थाहा छैन: ओली

काठमाडौं- प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले अहिले देशको परराष्ट्रमन्त्री को छ भन्ने आफूलाई थाहा नभएको भन्दै कटाक्ष गरेका छन्। प्रधानमन्त्री प्रचण्डको भारत भ्रमणका क्रममा परराष्ट्रमन्त्रीको उपस्थिति र भूमिका नदेखिएको भन्दै ओलीले व्यंग्य गरेका हुन्।

प्रतिनिधिसभाको बैठकमा सोमबार उनले भ्रमणका क्रममा प्रोटोकोलको उल्लंघन भएको बताए। उनले भारतीय प्रधानमन्त्री नरेन्द्र मोदीसँगको भेटमा छोरी गंगा दाहाललाई सहभागी गराइएकोमा प्रश्न उठाए।
प्रधानमन्त्रीले उच्च सरकारी अधिकारीको सट्टा आफ्नो परिवारको सदस्यलाई सहभागी गराइएकोमा उनको आपत्ति थियो।

ओलीले प्रधानमन्त्रीको भारत भ्रमण सबै हिसाबले भद्रगोल देखिएको टिप्पणी गरे। ‘प्रधानमन्त्रीले आफ्नो छेउमा छोरी राखेर राम्रो गर्नुभएन। भोलि नाति-नातिनी लिएर जानु भए के गर्ने? यस्ता भद्रगोल हुनु भएन। त्यहाँ परराष्ट्रमन्त्री हुनुपर्छ, परराष्ट्र सचिव हुनुपर्छ, रेकर्ड राख्ने मान्छे हुनुपर्छ। यस्ता कुरामा ध्यान दिनुपर्छ। यो तीर्थाटन हो कि फ्यामिली हो कि? धार्मिक भ्रमण हो कि?’