राष्ट्रपति पौडेलबाट नागरिकता विधेयक प्रमाणीकरण

काठमाडौं– राष्ट्रपति रामचन्द्र पौडेलले नेपाल नागरिकता ऐन, २०६३ लाई संशोधन गर्न बनेको विधेयक प्रमाणीकरण गरेका छन्। राष्ट्रपति पौडेलले नेपालको संविधानको धारा ६१ को उपधारा (२) (३) (४) र धारा ६६ एवं सर्वोच्च अदालतबाट प्रतिपादित सिद्धान्तबमोजिम नागरिकता विधेयक प्रमाणीकरण गरेको शीतलनिवासले जनाएको छ।

हालसम्म विधेयक प्रमाणीकरण नहुँदा ऐन नबनेको अवस्थामा १२ जेठको मन्त्रिपरिषद् बैठकको सिफारिअनुसार राष्ट्रपति पौडेलबाट प्रमाणीकरण गरिएको शीतलनिवासले बताएको छ।

नेपाल नागरिकता ऐन, २०६३ लाई संशोधन गर्न बनेको नेपाल नागरिकता (पहिलो संशोधन) विधेयक, २०७९ संघीय संसद्को दुवै सदनबाट गत १५ साउन २०७९ मा पारित भएको थियो ।

प्रतिनिधिसभाका तत्कालीन सभामुखबाट १५ साउनमा प्रमाणित गरी तत्कालीन राष्ट्रपति विद्यादेवी भण्डारीसमक्ष प्रमाणीकरणका लागि पेस भएको थियो।

केही विषयमा ध्यानाकर्षणसहित पुनर्विचारका लागि संघीय संसद्मा फिर्ता पठाइएकोमा ध्यानाकर्षण गराइएका विषयमा संघीय संसद्का दुवै सदनमा छलफल गरी प्रमाणीकरणका लागि पुनः २० भदौमा राष्ट्रपतिसमक्ष पठाइएको थियो। 

राष्ट्रपतिसमक्ष दोस्रोपल्ट पठाइएको विधेयक शीतलनिवासले रोकिराखेको थियो। सोही विधेयक आज राष्ट्रपति रामचन्द्र पौडेलले प्रमाणीकरण गरेका हुन्।