छैटौं वार्षिकोत्सवमा हाम्रो प्रण

नेपाल समय मिडिया आज (सोमबार) पाँच वर्ष पूरा गरेर छैटौं वर्षमा प्रवेश गरेको छ। छैटौं वार्षिकोत्सवको यस शुभ अवसरमा म आम पाठक, लेखक, विज्ञापनदाता, सहयोगी एवं शुभेच्छुक सबैमा हार्दिक धन्यवाद व्यक्त गर्दछु । साथै संस्थामा आबद्ध पत्रकार र अन्य कर्मचारी साथीहरूप्रति विशेष आभार व्यक्त गर्दछु। उहाँहरूको परिश्रम, लगाव र मायाकै कारण संस्थाले यहाँसम्मको यात्रा तय गरेको हो।

डिजिटल मिडियाको प्रतिस्पर्धी बजारमा एउटा संस्था जन्माएर आफ्नो पहिचान स्थापित गर्नु सजिलो काम होइन। प्रिय पाठकले देखाएको विश्वासका कारण हामीले यो पाँच वर्षको अवधिमा एउटा पहिचान स्थापित गर्न सफल भएका छौं। डिजिटल मिडियाको यो भीडमा अलग पहिचान बनाइराख्न अनवरत खटिरहनुभएका पत्रकार साथीहरुप्रति आभार व्यक्त गर्दै आगामी दिनमा पनि यस्तै सक्रियताको अपेक्षा राखेको छु। प्रिय पाठकको माया, सद्भाव र समालोचनात्मक प्रतिक्रियाले हामीलाई सधैं उत्साहित बनाइराख्ने उर्जा प्रदान गरिरहन्छ। 

पाठकको मायाले हामीमाथि नागरिकलाई अझ सुसूचित बनाउने दायित्व पनि थपिएको महसुस भएको छ। त्यसैले हामी अझै विशिष्टीकृत हुँदै जाने प्रयासमा छौं। मिडियाको प्रयासले नै आम नागरिकको जीवनस्तर, सोचाइ र समृद्धिमा योगदान पुग्नेमा हामी विश्वस्त छौं। डिजिटल मिडियाले समेट्नुपर्ने दायरा फराकिलो बन्दै गएको छ र यसप्रति पाठकका आशा, अपेक्षा र आकांक्षा पनि धेरै छन्। 

दुई वर्षभन्दा लामो कोरोना महामारीबाट भर्खरै पार पाए पनि मुलुक आर्थिक मन्दीको चपेटामा छ। अर्थतन्त्र लयमा फर्किन सकेको छैन। नागरिकका दैनन्दिनका समस्या ज्युँका त्युँ छन्। आवाजविहीनको आवाज मानिने पत्रकारिता क्षेत्रको भूमिका यस्तो अवस्थामा अझ बढी हुने गर्छ। आम नागरिकका सरोकार नै हाम्रा मूल विषयवस्तु हुन्। देशको मूल नीति मानिने राजनीतिलाई त झन् अलग गर्नै मिल्दैन।  

मुलुक संघीयतामा गइसकेपछिको दोस्रो आम निर्वाचन सम्पन्न भएर नागरिकले अर्को पाँच वर्षका लागि आफ्ना प्रतिनिधि चयन गरेर संसद्‍मा पठाइसकेका छन्। नागरिकको अमूल्य मत पाएर नीति निर्माणको जिम्मेवार तहमा पुगेका जनप्रतिनिधिमाथि पनि हाम्रो खबरदारी रहने नै छ। 

भ्रष्टाचार र अनियमितताविरुद्धको खबरदारी पनि सञ्चारमाध्यमको अर्को ठूलो जिम्मेवारी हो। यी सबैका अनिवार्य सर्त सत्य, तथ्य र विश्वसनीय सूचना प्रवाह नै हो। त्यसैले हामी निष्पक्ष पत्रकारिताप्रति निष्ठावान छौं र रहिरहनेछौं। कसैप्रति आग्रह(पूर्वाग्रह नराखी व्यावसायिक पत्रकारिता गर्नु हाम्रो मूल मन्त्र हो।

विगतमा पनि आम सञ्चारमाध्यमले लोकतन्त्र प्राप्ति, राजनीतिक संक्रमणकालको अन्त्य र दिगो शान्तिका लागि वकालत गरेको इतिहास छ। नागरिक अधिकार तथा मुलुकको सामाजिक एवं आर्थिक विकासका मुद्दामा हाम्रो वकालत अनवरत रहनेछ। 

नेपाल समय मिडियाको यस छैटौं वार्षिकोत्सवको शुभ अवसरमा नेपाल समय डटकम अनलाइन न्युज पोर्टल लोकतन्त्र, गणतन्त्र, राष्ट्रियता, प्रेस र अभिव्यक्ति स्वतन्त्रताको वकालत गर्दै सत्य–तथ्य सूचना सम्प्रेषणमा निर्भीकतापूर्वक सक्रिय रहिरहने विश्वास दिलाउन चाहन्छु। साथै १६ औं गणतन्त्र दिवसका अवसरमा सम्पूर्ण नेपाली दिदीबहिनी दाजुभाइमा हार्दिक मंगलमय शुभकामना व्यक्त गर्दछु। धन्यवाद।

विश्वनाथ शाह
अध्यक्ष, नेपाल समय मिडिया प्रा.लि.