प्रतिनिधिसभामा चन्द्र भण्डारीको सम्बोधन, सुविधासम्पन्न जलन अस्पताल निर्माणको माग

काठमाडौं– कांग्रेस सांसद चन्द्र भण्डारीले तीन महिनापछि प्रतिनिधिसभा बैठकमा सम्बोधन गरेका छन्।

बुद्धनगरस्थित घरमा ग्यास सिलिन्डर लिक भएर आगलागी हुँदा गत ४ फागुनमा जलेर गम्भीर घाइते भएपछि भण्डारीलाई कीर्तिपुरस्थित बर्न हस्पिटल लगिएको थियो। त्यहाँ उपचार सम्भव नभएपछि थप उपचारार्थ उनलाई भारतको मुम्बई लगिएको थियो।

ग्यास सिलिन्डर लिकमा परेर भण्डारीकी आमा हरिकलाको भने कीर्तिपुरस्थि तबर्न हस्पिटलमा उपचारका क्रममा निधन भएको थियो। सांसद भण्डारी भारतमा उपचार गराएर केही दिनअघि नेपाल फर्किएका हुन्। सभामुख देवराज घिमिरेबाट १२ मिनेट समय पाएका भण्डारीले बसेरै संसद्मा आफ्ना कुरा राखे।

भण्डारीले नेपालमा जलन उपचारका लागि सुविधासम्पन्न अस्पताल खोल्न सरकारसँग आग्रह गरे। उनले अरु देशमा भन्दा नेपालका स्वास्थ्यकर्मी र डाक्टर कम नभएको आफूले मुम्बई उपचार गर्दाको अनुभव सुनाए।

उनले भने, ‘म कीर्तिपुरबाट जाँदा निदाएको थिएँ। बम्बईमा सात दिनपछि ब्युँझिएँ। ब्युँझिँदा धेरै साथीहरूले सहयोग गरेको पाएँ। त्यो सहयोगको सम्मान गर्दै सरकारले दिने सहयोग जलन हस्पिटल बनाउनमा प्रयोग होस्।’

भण्डारीको उपचार खर्च सरकारले व्यहोर्ने निर्णय गरेको थियो। भारतबाट फर्किएपछि पत्रकार सम्मेलनमा उनले आधुनिक जलन उपचार केन्द्र निर्माण गरिनुपर्ने बताएका थिए। उनले प्रतिनिधिसभा बैठकमा आफ्नो उपचारमा सघाउने सरकार, स्वास्थ्यलाभको कामना गर्ने सबैप्रति आभार व्यक्त गरे।

उनले भने, ‘छिमेकी देशमा मलाई पठाएर मैले त्यहाँ जलनसम्बन्धी उपचार हेर्ने मौका पाएँ। त्यहाँका डाक्टरले विगत तीन वर्षमा तीन जना मात्रै भेन्टिलेरमा गएर बाँचेका छन्। म बाँचेर प्रतिनिधिसभामा आएर बोल्न पाएँ। यसलाई सौभाग्य ठानेको छु।’

आफूले उपचार गराएका बाउछोराले चलाएको अस्पताल एसियाकै उत्कृष्ट गरेको उल्लेख गर्दै नेपालमा पनि सोहीअनुसार निर्माण गर्न आजैदेखि प्रक्रिया थाल्नुपर्ने उनले सुझाव दिए। उनले भने, ‘सदनबाटै मैले प्रधानमन्त्रीलाई आग्रह गर्छु, हामीले एउटा आधुनिक जलन हस्पिटल बनायौं भने एसियाको सबैभन्दा सबल हस्पिटल नेपालमा बन्न सक्छ।’