सत्तापक्ष र प्रतिपक्ष दुवैले समर्थन गर्ने प्रधानमन्त्री आफू मात्रै भएको प्रचण्डको दाबी

काठमाडौं– प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले सत्तापक्ष र प्रतिपक्ष दुवैले समर्थन गर्ने आफूजस्तो प्रधानमन्त्री कहीँ नभेटिने दाबी गरेका छन्। आज राष्ट्रिय सभामा सरकारका नीति तथा कार्यक्रममाथि सांसदहरुले सोधेको प्रश्नको जवाफ दिँदै प्रधानमन्त्री प्रचण्डले आफ्नै गुणगान गाएका हुन्।

१० पुसमा सरकारको नेतृत्व गर्दा प्रतिपक्षी रहेको कांग्रेसले प्रचण्डलाई संसद्मा विश्वासको मत दिएको थियो। त्यतिबेला संघीय संसद् करिब करिब प्रतिपक्षीविहीनजस्तो भएको थियो। प्रधानमन्त्री प्रचण्डले आफू कम्फर्टेबल भएकै कारण पक्ष–प्रतिपक्ष सबैको रोजाइमा परेको दाबी गरे।

उनले भने, ‘नीति तथा कार्यक्रममा सबैका बुद्धि विवेक प्रयोग भएका छन्। हिजो सत्तापक्ष र प्रतिपक्षमा रहेकाको विचार, धारणा, सैद्धान्तिक प्रतिबद्धत र साझा न्यूनतम कार्यक्रम समेटिएका छन्। यो मौलिक विशेषतालाई हामी सबैले ध्यान दिन जरुरी छ। अघिल्लो पटक सत्तापक्ष र प्रतिपक्ष दुवैले समर्थन गरेको प्रधानमन्त्री हुँ। यस्तो प्रधानमन्त्री सितिमिति भेटिँदैन। नेपालको सन्दर्भमा मौलिक छ।’

आफूले पहिलो पटक विश्वासको मत लिँदा ९९ प्रतिशत सांसदको समर्थन पाएको प्रचण्डले बताए। यद्यपि  दोस्रोपल्ट विश्वासको मत लिँदा भने एमाले र राप्रपालगायत दलले विश्वासको मत दिएनन्।