प्रचण्ड सरकारले पाँच महिनापछि पायो पूर्णता

काठमाडौं– गत वर्ष १० पुसमा प्रधानमन्त्री पदको सपथ लिएर सरकारको नेतृत्वमा पुगेका पुष्पकमल दाहाल प्रचण्डले ११औं पल्ट मन्त्रिपरिषद् विस्तार गरेका छन्। आज प्रधानमन्त्री प्रचण्डको सिफारिसमा राष्ट्रपति रामचन्द्र पौडेलले जसपाबाट एक मन्त्री र एक राज्यमन्त्री नियुक्त गरेका हुन्।

जसपाका वीरेन्द्रप्रसाद महतो वन तथा वातावरण मन्त्री र शिक्षा, विज्ञान तथा प्रविधि राज्यमन्त्रीमा प्रमिला कुमारी नियुक्त भएका हुन्। महतो सिरहा ४ बाट प्रतिनिधिसभा सदस्य निर्वाचित हुन्। आज नियुक्त दुई मन्त्रीलाई भोलि बिहान १० बजे सपथ खुवाइने राष्ट्रपति कार्यालय जनाएको छ।

आज गरिएको मन्त्रिपरिषद् विस्तारसँगै प्रचण्ड नेतृत्वको सरकारले पूर्णता पाएको छ। पाँच महिनापछि प्रचण्ड सरकार पूर्ण भएको हो।