नक्कली शरणार्थी प्रकरणः देउवा र ओलीमाथि अनुसन्धान गर्न नेमकिपाको माग

काठमाडौं– नेपाल मजदुर किसान पार्टीले नक्कली भुटानी शरणार्थी प्रकरणमा पूर्वप्रधानमन्त्रीद्वय शेरबहादुर देउवा र केपी ओलीमाथि पनि छानबिन हुनुपर्ने माग गरेको छ। सोमबार संघीय प्रतिनिधिसभामा सरकारको नीति तथा कार्यक्रममाथिको छलफलका क्रममा नेमकिपाका सांसद प्रेम सुवालले यस्तो माग गरेका हुन्।

नक्कली शरणार्थी प्रकरणमा दुई पूर्वमन्त्री बालकृष्ण खाण र टोपबहादुर रायमाझी पक्राउ परेपछि अब पूर्वप्रधानमन्त्रीद्वयमाथि पनि अनुसन्धान गरिनुपर्ने उनको धारणा छ। उनले भने, ‘प्रधानमन्त्रीय प्रणालीमा मन्त्रीहरुको कामको जसअपजस प्रधानमन्त्रीले लिनुपर्छ। नक्कली भुटानी शरणार्थी प्रकरणमा पूर्वमन्त्री अनुसन्धानका लागि प्रहरी हिरासतमा छन्। यो प्रकरणमा पूर्वप्रधानमन्त्रीद्वयलाई पनि बयानमा बोलाएर अनुसन्धानलाई पूर्णता दिनुपर्छ।’

सुवालले सत्ता र राजनीतिक शक्तिको आडमा नक्कली शरणार्थी प्रकरणलाई फासफुस बनाउने प्रपञ्च भइरहेको भन्दै सदनमा खबरदारीसमेत गरे।नक्कली शरणार्थी प्रकरणमा कांग्रेस, एमालेलगायत शीर्ष नेतृत्वको सहभागिता रहेको उनको दाबी छ। घटनालाई गुपचुप बनाउन सरकारबाटै सहयोग भइरहेको उनले बताए।