नीति तथा कार्यक्रममाथि आजदेखि छलफल सुरु

काठमाडौं- सरकारको तर्फबाट राष्ट्रपति रामचन्द्र पौडेलले अस्ति शुक्रबार स‌ंसद्‍मा प्रस्तुत गरेको नीति तथा कार्यक्रममाथि आजदेखि छलफल सुरु हुँदैछ। प्रतिनिधिसभाको बैठक बिहान ११ बजे बोलाइएको छ।

आजको बैठकमा प्रधानमन्त्री पुष्पकमल दाहालले राष्ट्रपति पौडेलले संघीय संसद्को संयुक्त बैठकमा वाचन गरेको सरकारको नीति तथा कार्यक्रममाथि छलफलका लागि प्रस्ताव पेस गर्ने कार्यसूची छ। सांसदहरुलाई शुक्रबार नीति तथा कार्यक्रममा संशोधन प्रस्तुत गर्न समय दिइएकोमा आज ती संशोधन प्रस्तुत गर्ने कार्यसूचीसमेत छ।

नीति तथा कार्यक्रमबारेको छलफलमा प्रमुख विपक्षी दल नेकपा एमाले कडाइका साथ प्रस्तुत हुने भएको छ। शनिबार एमाले अध्यक्ष केपी ओलीले आफ्ना सांसदलाई नीति तथा कार्यक्रममा पार्टीका धारणा कडाइका साथ प्रस्तुत गर्न निर्देशन दिएका छन्।

‘एमालेको भूमिका अलि लुलोलुलो भयो। नुन खाएको कुखुरा जस्तो, झोक्राए जस्तो के भएको भनेर भन्ने गरेका छन्। त्यसैले हाम्रो प्रस्तुति संसदमा कडा हुनुपर्दछ। संसदमा जति समय पाउनुहुन्छ। आफ्ना कुरा कडाइका साथ राख्नुहोला,’ उनले भनेका थिए। एमालेको तर्फबाट पहिलो वक्ता ‌ओली नै हुने बताइएको छ।