नीति तथा कार्यक्रममाथि आइतबारदेखि बहस, पहिलो वक्ता ओली

काठमाडौं– राष्ट्रपति रामचन्द्र पौडेलले शुक्रबार संसद्का दुवै सदनमा पेस गरेको सरकारको आगामी आर्थिक वर्षको नीति तथा कार्यक्रमबारे आइतबारदेखि सदनमा बहस सुरु हुने भएको छ।

एमाले अध्यक्ष केपी ओलीले आइतबारको प्रतिनिधिसभा बैठकमा सरकारको नीति तथा कार्यक्रमबारे पहिलो वक्ताका रुपमा आफ्ना धारणा राख्ने भएका हुन्। आज शनिबार बसेको एमाले संसदीय दलको बैठकमा अध्यक्ष ओलीले यस्तो जानकारी दिएका हुन्। 

‘हिजो प्रस्तुत भएको र भोलिबाट छलफल सुरु हुने नीति तथा कार्यक्रमबारे संसद् बैठकको सुरुमै मैले धारणा राख्ने हो,’ ओलीले भने।अध्यक्ष ओलीले संसदीय दल बैठकमा सरकारले शुक्रबार प्रस्तुत गरेको नीति तथा कार्यक्रम शब्दजालबाहेक केही नभएको टिप्पणी गरे। 

उनले भने, ‘नीति तथा कार्यक्रम नजान्ने मान्छेले चिट चोरेजस्तो छ। राजनीति अस्थिरता, अन्योल र अराजकताबारे कुनै चिन्ता देखिएन।’ संसदीय दलको बैठकमा सरकारले ल्याएको नीति तथा कार्यक्रमबारे कुनै नीतिमाथि छलफल नभएको उनले बताए।