देश सम्हाल्नकै लागि संविधान संरक्षण अपरिहार्य : पूर्वराष्ट्रपति यादव

काठमाडौं– नेपालका प्रथम राष्ट्रपति डा. रामवरण यादवले देश सम्हाल्नकै लागि अहिलेको संविधानको संरक्षण जरुरी रहेको बताएका छन्। उनले संविधानको पुनःमूल्यांकन गर्ने बेला नभएको औंल्याएका छन्।

वरिष्ठ अधिवक्ता डा. चन्द्रकान्त ज्ञवाली लिखित पुस्तक नेपालको संविधानको व्याख्या भाग १ र २ को विमोचन कार्यक्रमलाई सम्बोधन गर्दै पूर्वराष्ट्रपति यादवले यस्तो बताएका हुन्।

यादवले अहिले नै संविधानको पुनःमूल्यांकनको बेला नभए पनि पूर्ण रुपमा संविधान लागू गरेर जाने समय रहेको औंल्याए। वर्तमान संविधानको कार्यान्वयन सही ढंगबाट गर्न बाँकी नै रहेको उनको भनाइ छ।

वर्तमान संविधानलाई संरक्षण गरेर लैजान नसके देशलाई सम्हाल्न गाह्रो हुने बताउँदै पूर्वराष्ट्रपति यादवले भूराजनीतिक, अन्तर्राष्ट्रिय परिप्रेक्ष्य, लोकतान्त्रिक व्यवस्था र कानुनको शासनलाई सोचेर नै संविधान बनाइएको दाबी गरे। उनले भने, ‘‘संविधानलाई पुनःमूल्यांकन गर्ने बेला भएको छैन। यसलाई लागू गर्नेतिर जाऔं। एकाध चुनाव होउन्, राम्रोसँग यो लागू होस्।’

कार्यक्रममा लेखक वरिष्ठ अधिवक्ता डा. चन्द्रकान्त ज्ञवालीले जनप्रतिनिधिले संविधान अनुकूल काम नगर्दा पुस्तकबाट जनतामा सुसूचित गर्ने लक्ष्यका साथ पुस्तक लेखिरहेको बताए। उनले नेपालमा शासकले विधिलाई शासन गरिरहेको औंल्याए।

उनले भने, ‘जनताले जुन मत दिन्छन्, प्रतिनिधि पठाउँछन्। ती प्रतिनिधिले आफ्नो संविधान अनुकूल काम गर्दैनन्। रुल अफ ल हुनुपर्नेमा रुल बाई ल हुन्छ, शासकले विधिलाई शासन गरिरहेको छ, विधिले शासकलाई शासन गर्नुपर्ने हो।’