नागरिक उन्मुक्तिको पदाधिकारी बैठक, सरकारलाई समर्थनबारे पुनर्विचारको आकलन

काठमाडौं– सत्तारुढ नागरिक उन्मुक्ति पार्टीको पदाधिकारी बैठक दिउँसो १ बजे बस्दै छ। ऋाज बस्ने बैठकले पछिल्लो घटनाक्रम, सरकारबाट बाहिरिने, समर्थन फिर्ता लिनेलगायत विषयमा छलफल गर्ने बुझिएको छ।

बैठकमा काठमाडौंमा उपलब्ध पदाधिकारी उपस्थित हुने पार्टी महासचिव रतन थापाले बताए। उनले भने, ‘आन्दोलनका कार्यक्रम व्यवस्थित गर्न र सर्वोच्च अदालतको फैसलाबारे एकीकृत धारणा तय गर्न बैठक बस्दै छौं। सरकारबाट फिर्ती वा समर्थनबारे पनि छलफल हुन सक्छ।

’टीकापुर घटनामा दोषी ठहर गर्दै जन्मकैदको सजाय सुनाउने जिल्ला अदालत कैलाली र उच्च अदालत दिपायलको फैसला सर्वोच्च अदालतले सदर गरेपछि नागरिक उन्मुक्तिले पाँच दिने नेपालबन्दसहितका कार्यक्रम सार्वजनिक गरेको छ।

टीकापुर प्रकरण राजनीतिक भएको र अदालतको फैसलाप्रति कुनै टिप्पणी नरहेको जेलबासमा रहेका संस्थापक रेशम चौधरीले हिजै विज्ञप्ति निकालेर बताएका छन्। डिल्लीबजार कारागारमा रहेका रेशमले अदालतको फैसलाबाट विचलित नभएको प्रतिक्रिया दिएका छन्।

‘हामीले ३ दिनभित्र गिरिशचन्द्र लालले दिएको प्रतिवेदन सार्वजनिक गर्न माग गरेका छौं। तीन दिनभित्र कुनै पनि प्रतिवेदन सार्वजनिक नगरिए आन्दोलन सशक्त बनाएर लैजान्छौं। हाम्रा माग पूरा नभए सरकारबाट फिर्ती र समर्थन नहुनेसम्मका निर्णयमा पुग्छौं’, महासचिव थापाले भने।